اعىمداعى جىلى ينۆەستيسيالىق جوبالاردى پروكۋرورلىق قولداۋ شەڭبەرىندە ەكونوميكاعا سالىنعان سالىمدار سوماسى 9 ترلن تەڭگەدەن اساتىن 411 كەيستتىڭ پروبلەمالارى شەشىلدى.
وسى جۇمىس بارىسىندا 166 قاداعالاۋ اكتىسى ەنگىزىلدى، سوتتىڭ 4 شەشىمى جانە مەملەكەتتىك ورگانداردىڭ 52 اكتىسى توقتاتىلىپ، 106 لاۋازىمدى تۇلعا جاۋاپقا تارتىلدى.
مىسالى، قارىز قاراجاتىن پايدالانا وتىرىپ، ۆاگوندار پاركىن جاڭعىرتقان 3 كومپانيا ىشكى مەملەكەتتىك اۋديت كوميتەتىنىڭ 1،7 ملرد تەڭگەگە سۋبسيديالاردى قايتارۋ تۋرالى تالاپتارىنا تاپ بولدى.
ۋاكىلەتتى ورگان تاسىمالداۋشىلارمەن نەسيە مولشەرلەمەلەرىن سۋبسيديالاۋ بويىنشا ارتىق سىياقى العانى ەسەپتەلىپ، كولىك كوميتەتىنىڭ سوتقا شاعىمدارمەن جۇگىنۋىنە نەگىز بولدى.
استانانىڭ سوتتارى كوميتەتتىڭ تالاپتارىن قولدادى.
دەگەنمەن، قاداعالاۋشى ورگان تاسىمالداۋشىلار تاراپىنان بۇزۋشىلىقتاردى بايقاماي، سۋبسيديالار بەكىتىلگەن بيۋدجەتتىك وتىنىمدەر شەگىندە اۋدارىلعانىن، ال تاسىمالداۋشىلاردىڭ ناقتى شىعىندارى ولاردان ەداۋىر اسىپ تۇسكەنى انىقتالدى.
سونداي-اق، كوميتەت قايتارىلۋعا جاتاتىن سومانى ەسەپتەۋ كەزىندە الەۋمەتتىك ماڭىزى بار قاتىناستار بويىنشا جولاۋشىلاردى تاسىمالداۋدى جۇزەگە اسىراتىن تاسىمالداۋشىلاردىڭ شىعىستارىن ۇزاق مەرزىمدى سۋبسيديالاۋ كولەمىن ايقىنداۋ جونىندەگى ادىستەمەنى قولدانباعان.
ناتيجەسىندە، باس پروكۋراتۋرانىڭ نارازىلىعىقتارى بويىنشا جوعارعى سوت سوت اكتىلەرىنىڭ كۇشىن جويىپ، كولىك كوميتەتىنىڭ تالاپتارىن قاناعاتتاندىرۋدان باس تارتتى.
وسىلايشا، تاسىمالداۋشىلاردان 1،7 ملرد تەڭگەنى نەگىزسىز ءوندىرىپ الۋعا جول بەرىلمەدى، بۇل الەۋمەتتىك ماڭىزى بار جولاۋشىلار تاسىمالدارىنا تاريفتەردىڭ ۇلعايۋىن بولدىرماۋعا مۇمكىندىك بەردى.
ەستەرىڭىزگە سالا كەتەيىك، ەگەر ءسىز ينۆەستور بولساڭىز جانە جوبانى ىسكە اسىرۋدا قيىندىقتار تۋىنداسا، وندا ءسىز باس پروكۋراتۋرانىڭ كاسىپكەرلەر مەن ينۆەستورلاردىڭ قۇقىقتارىن قورعاۋ جونىندەگى Call-ورتالىعىنا (تەل. (7172) 30-17-93، +7-702-629-75-61) قۇقىقتىق كومەك پەن كەڭەس الۋ ءۇشىن جۇگىنە الاسىز.