پروكۋرورلار زاڭنىڭ كورسەتىلگەن نورمالارىن قاتاڭ ساقتاۋعا شاقىردى.
ق ر باس پروكۋراتۋراسى قىلمىستىق قۋدالاۋ قىزمەتى باسشىسىنىڭ ورىنباسارى ەلدوس قيلىمجانوۆ قاڭتار وقيعاسىن تەرگەۋ بارىسىنا قىسىم كورسەتىپ جاتقاندار تۋرالى ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«قازىرگى ۋاقىتتا جەكەلەگەن ادامدار الەۋمەتتىك جەلىلەر مەن بۇقارالىق اقپارات قۇرالدارى ارقىلى زاڭسىز تالاپتار قويىپ وتىر. ولار قابىلدانعان پروسەستىك شەشىمدەرمەن كەلىسپەگەندىكتەن، تەرگەۋگە قىسىم كورسەتۋ ماقساتىندا قىلمىستىق ىستەردى تەرگەۋ بارىسىنا ارالاسىپ جاتىر»، - دەدى ەلدوس قيلىمجانوۆ ورتالىق كوممۋنيكاسيالار قىزمەتىندە.
وسى ورايلا ول قىلمىستىق-پروسەستىك زاڭنامانىڭ تالاپتارىنا سايكەس، تەرگەۋ ارەكەتتەرىنە قاتىسۋ بويىنشا ادامداردىڭ ناقتى تىزبەسىنە رۇقسات ەتىلگەنىن ەسكە سالدى. ولاردىڭ قاتارىندا ادۆوكاتتار، قورعاۋشى تاراپتىڭ زاڭدى وكىلدەرى، جابىرلەنۋشىلەر بار. بۇل ادامداردىڭ پروكۋراتۋراعا دا، تەرگەۋ سوتىنا دا تەرگەۋ ورگانىنىڭ ىس-ارەكەتتەرىنە ءوتىنىشحات نەمەسە شاعىم بەرۋگە قۇقىعى بار.
بۇل تۇرعىدا قىلمىستىق-پروسەستىك كودەكسىندە پروسەستىك شەشىمدەرگە شاعىم جاساۋدىڭ ناقتى ءتارتىبى ايقىندالعان.
«وسىعان بايلانىستى قىلمىستىق پروسەسكە قاتىسۋشىلار مەن قورعاۋشىلاردى زاڭنىڭ كورسەتىلگەن نورمالارىن قاتاڭ ساقتاۋعا شاقىرامىن. پروكۋراتۋرا ورگاندارى بارلىق قىلمىستىق ىستەر بويىنشا قىلمىستىق-پروسەسكە قاتىسۋشىلاردىڭ قۇقىقتارىن ساقتاۋدى قامتاماسىز ەتىپ وتىرعانىن اتاپ وتەمىن. قىلمىستىق ىستەردى تەرگەۋ كەزىندە قۇقىق قورعاۋ جانە ارنايى ورگانداردىڭ قىزمەتىنە ارالاسقانى ءۇشىن جاۋاپتىلىق تۋرالى باس پروكۋراتۋرا بىرنەشە رەت ەسكەرتكەنىن ەرەكشە ايتىپ وتكىم كەلەدى. وزگە ادامداردىڭ سوتقا دەيىنگى تەرگەۋ بارىسىنا ارالاسۋ ارەكەتى ءۇشىن اكىمشىلىك جانە قىلمىستىق جاۋاپتىلىق قاراستىرىلعان»، - دەدى باس پروكۋراتۋرانىڭ وكىلى.
بۇدان بۇرىن حابارلانعانداي، قازىرگى كەزدە ارنايى پروكۋرورلاردىڭ ءىس جۇرگىزۋىندە جاپپاي تارتىپسىزدىكتەر بويىنشا 53 جانە تەرروريزم اكتىلەرىنە قاتىستى 32 قىلمىستىق ءىس بار .
مەملەكەتتىك وبەكتىلەردى ورتتەۋ، مۇلىكتەردى جويۋ جانە تەرروريزم اكتىلەرى الماتى، شىمكەنت قالالارىندا، اقتوبە، اتىراۋ، الماتى، جامبىل، قىزىلوردا جانە شىعىس قازاقستان وبلىستارىندا جاسالعانى بەلگىلى بولدى.