بۇگىن باس پروكۋراتۋرادا قازاقستان رەسپۋبليكاسىنىڭ پروكۋراتۋرا كۇنىن مەرەكەلەۋگە ارنالعان سالتاناتتى جيىن ءوتتى.
باس پروكۋرور بەرىك اسىلوۆ ءبىرىنشى كەزەكتە زاڭدىلىق پەن ادىلدىكتى قورعاعان پروكۋراتۋرا ورگاندارىنىڭ ارداگەرلەرىنە العىسىن ءبىلدىردى، دەپ حابارلايدى Almaty-akshamy.kz باس پروكۋراتۋراعا سىلتەمە جاساپ.
«بۇگىن ءبىز كاسىبي مەرەكەمىزدى اتاپ ءوتىپ قانا قويماي، پروكۋراتۋرا سالاسىنىڭ ىرگەتاسىن قالاعان اعا بۋىننىڭ بىزگە قالدىرعان وشپەس ءىزىن بۇگىنگى ماقتان ەتەرلىك تاريح ەكەنىن مويىندايمىز. بۇل زاڭعا ادال قىزمەت ەتۋدىڭ، ازاماتتاردىڭ قۇقىقتارىن ءادىل قورعاۋدىڭ جانە ادىلەتتىلىك ءۇشىن تاباندى كۇرەستىڭ جاۋاپتى دا يگى جولى»، - دەپ اتاپ ءوتتى ول.
سونداي-اق باس پروكۋرور مەملەكەت باسشىسىنىڭ باستاماسى بويىنشا ەلدە جۇرگىزىلىپ جاتقان اۋقىمدى رەفورمالارعا، ونىڭ ىشىندە قۇقىق قورعاۋ تەتىكتەرىن نىعايتۋ، قوعامداعى قۇقىقتىق مادەنيەتتى ارتتىرۋ جانە كەز كەلگەن قۇقىق بۇزۋشىلىقتارعا مۇلدەم توزبەۋشىلىك قاعيداتىن ساقتاۋعا توقتالدى.
«پروكۋراتۋرا تۋرالى» جاڭا كونستيتۋسيالىق زاڭنىڭ قابىلدانۋى پروكۋراتۋرانىڭ ازاماتتاردىڭ كونستيتۋسيالىق قۇقىقتارىن ساقتاۋ جانە قىلمىستىق پروسەستەگى رەپرەسسيۆتىلىكتى تومەندەتۋ، قوعامداعى زورلىق-زومبىلىققا قارسى ءىس-قيمىل، بيزنەستى قورعاۋ، زاڭسىز شىعارىلعان اكتيۆتەردى قايتارۋ جانە زاڭدىلىقتى، قۇقىقتىق ءتارتىپتى جانە قىلمىسقا قارسى كۇرەستى قامتاماسىز ەتۋ جونىندە باسقا دا ماسەلەلەرى بويىنشا ۇيلەستىرۋشى ءرولىن كۇشەيتۋدەگى ماڭىزدى قادام بولدى.
پروكۋرورلىق قاداعالاۋ مەملەكەت پەن قوعام ءومىرىنىڭ بارلىق باعىتتارىن قامتيدى. كۇن سايىن تەكسەرۋلەر جۇرگىزىلەدى، زاڭناما نورمالارىن ساقتاۋ بويىنشا مەملەكەتتىك ورگانداردىڭ اكتىلەرىنە تالداۋ جاسالادى. بۇزۋشىلىقتار انىقتالعان كەزدە ولاردى جويۋ جانە ازاماتتاردىڭ بۇزىلعان قۇقىقتارىن قالپىنا كەلتىرۋ بويىنشا شارالار قابىلدانادى.
اتقارىلعان جۇمىستاردى اتاپ ءوتىپ، بەرىك اسىلوۆ ارىپتەستەرىنە ءوز قىزمەتتىك بورىشتارىنا ادالدىق تانىتقاندارى ءۇشىن العىسىن ءبىلدىردى. ول قوعامنىڭ ءتۇرلى سالالارىندا ازاماتتاردىڭ قۇقىقتارىن قورعاۋدىڭ كەپىلدىكتەرىن ودان ءارى نىعايتۋدىڭ ماڭىزدىلىعىن اتاپ ءوتىپ، مەملەكەت باسشىسىنىڭ پروكۋراتۋرا ورگاندارىنىڭ الدىنا قويعان ماقساتتارى مەن مىندەتتەرىنە تابىستى قول جەتكىزۋىنە سەنىم ءبىلدىردى.
باس پروكۋروردىڭ بۇيرىعىمەن ءمىنسىز قىزمەتى مەن مىندەتتەرىن ۇلگىلى ورىنداعانى ءۇشىن 450 قىزمەتكەر ماراپاتتالدى.