2021 جىلدىڭ قىركۇيەك ايىنان باستاپ.
ق ر بعم-نە ۆەدومستۆولىق باعىنىشتى جوعارى وقۋ ورىندارى وقىتۋشىلارىنىڭ جالاقىسى 2021 جىلدىڭ قىركۇيەگىنەن باستاپ ارتادى، دەپ حابارلايدى Almaty-akshamy.kz
مينيسترلىكتىڭ مالىمەتىنە سايكەس، ەندى جوو وقىتۋشىسى اي سايىن كەمىندە 200 مىڭ تەڭگە الاتىن بولادى. اعا وقىتۋشىنىڭ ەڭبەكاقىسى كەمىندە 230 مىڭ تەڭگەنى قۇراپ، قاۋىمداستىرىلعان پروفەسسور – 260 مىڭ تەڭگە، پروفەسسور – 350 مىڭ تەڭگە (ۇلتتىق جوعارى وقۋ ورىندارىندا – 400 مىڭ تەڭگە) الۋى ءتيىس.
«بۇل شەشىم ەل پرەزيدەنتى ق.توقايەۆتىڭ جوو وقىتۋشىلارىنىڭ جالاقىسىن ارتتىرۋ تۋرالى تاپسىرماسىن ورىنداۋ اياسىندا قابىلداندى. شتاتتاعى وقىتۋشىلارعا مينيمالدى جالاقى مولشەرىن بەلگىلەۋ تۋرالى ءتيىستى بۇيرىققا ءبىلىم جانە عىلىم ءمينيسترى اسحات ايماعامبەتوۆ قول قويدى»، – دەلىنگەن مينيسترلىك تاراتقان اقپاراتتا.
ۆەدومستۆو باسشىسىنىڭ سوزىنە قاراعاندا، وقىتۋشىلاردىڭ جالاقىسى كوتەرىلگەنىمەن، ولاردىڭ وقۋ جۇكتەمەسى تومەندەتىلەدى. بۇل مۇعالىمدەردىڭ عىلىمي قىزمەتپەن اينالىسۋلارىنا مۇمكىندىك پەن ۋاقىتتىڭ جەتكىلىكتى بولۋى ءۇشىن جاسالىپ جاتىر.
«ءبىز جوسپارلى تۇردە وقىتۋشىلار ءۇشىن جايلى جاعداي جاساپ، ەڭبەكاقىنى جانە پەداگوگتەردىڭ مارتەبەسىن ارتتىرىپ جاتىرمىز. جوو وقىتۋشىلارىنىڭ جالاقىسى دا جوعارىلايتىن بولادى. ەگەر ءبىز ءبىلىمنىڭ جوعارى دەڭگەيدە بولۋىن قالاساق، مۇعالىمدەرگە لايىقتى جالاقى تولەۋ كەرەك ەكەنىن ءتۇسىنۋىمىز كەرەك. بۇل رەتتە ءبىز جوعارى وقۋ ورىندارى تاراپىنان ساپالى جۇمىستى، ال وقىتۋشىلاردان وقۋ پروسەسىنە اسقان جاۋاپكەرشىلىكپەن قاراۋدى تالاپ ەتەمىز. بۇعان دەيىن ۇلتتىق قوعامدىق سەنىم كەڭەسىنىڭ وتىرىسىندا مەملەكەت باسشىسى جوو وقىتۋشىلارىنىڭ جالاقىسىن كوتەرۋدى تاپسىرعان بولاتىن. بعم-گە ۆەدومستۆولىق باعىنىشتى جوو وقىتۋشىلارىنىڭ جالاقىسى 2019 جىلدىڭ قىركۇيەگىندە 20%-كە، 2020 جىلدىڭ قىركۇيەگىندە تاعى 20%-عا ءوستى. ەندى شتاتتاعى وقىتۋشىلاردىڭ مينيمالدى جالاقىسى اي سايىن 200 مىڭ تەڭگەنى قۇرايدى. سونىمەن قاتار ءار ۋنيۆەرسيتەت باسقا دا ىنتالاندىرۋ تولەمدەرىن بەلگىلەپ، وقىتۋشىلاردىڭ بەلگىلى ءبىر جەتىستىكتەرى ءۇشىن قوسىمشااقى تولەي الادى. جوعارى وقۋ ورىندارىنىڭ ديرەكتورلار كەڭەسى بۇل ماسەلەنى ەرەكشە باقىلاۋدا ۇستاۋى قاجەت»، – دەپ اتاپ ءوتتى قازاقستان رەسپۋبليكاسىنىڭ ءبىلىم جانە عىلىم ۆيسە-مينيسترى قۋانىش ەرعالييەۆ.
پەداگوگيكالىق جۇكتەمەگە كەلەتىن بولساق، ەندى ءبىر ستاۆكانىڭ ماكسيمالدى كولەمى ءبىر وقۋ جىلىندا 680 ساعاتتان اسپايدى. ايتا كەتكەن ءجون، بۇرىن ەڭ تومەنگى جالاقى مەن ساعاتتىق جۇكتەمەلەرگە قويىلاتىن تالاپتار زاڭمەن رەتتەلمەگەن.