سەزدە كوپتەگەن سالماقتى وي، ساليقالى پىكىر ايتىلدى.
مەملەكەت باسشىسى قاسىم-جومارت توقايەۆتىڭ الەمدىك جانە ءداستۇرلى دىندەر كوشباسشىلارىنىڭ VII سەزىنىڭ جابىلۋ راسىمىندە سويلەگەن ءسوزى جاريالاندى، - دەپ حابارلايدى Almaty-akshamy.kz اقورداعا سىلتەمە جاساپ.
«اسا ءقادىرلى مەيماندار! قۇرمەتتى سەزگە قاتىسۋشىلار! قازاق جەرى ەكى كۇننەن بەرى ءتۇرلى مادەنيەتتەردىڭ سىندارلى سۇحبات ورتالىعىنا اينالدى. دۇنيە جۇزىندەگى بەدەلدى ءدىنباسىلار ءبىر شاڭىراقتىڭ استىنا جينالدى.
سىزدەر بارشا ادامزاتتىڭ كۇش-جىگەرىن ورتاق مۇددەگە جۇمىلدىرۋ ءۇشىن الەمنىڭ ءار تۇكپىرىنەن كەلىپ وتىرسىزدار. وسىنىڭ ءوزى ءدىنارالىق كەلىسىم مەن ىنتىماقتاستىقتىڭ قانشالىقتى ماڭىزدى ەكەنىن كورسەتەدى. شىن مانىندە، ءبارىمىزدىڭ ماقساتىمىز – ءبىر. بۇل – وركەنيەتتەر ۇندەستىگىن ورناتۋ جانە بەيبىتشىلىك پەن تۇراقتىلىقتى نىعايتۋ.
سەزدە كوپتەگەن سالماقتى وي، ساليقالى پىكىر ايتىلدى. ونىڭ ءبارى ءبىزدىڭ ۇيلەسىمدى الەم قۇرۋ جولىنداعى ىس-ارەكەتىمىزگە وڭ ىقپالىن تيگىزەدى دەپ سانايمىن. مەن القالى جيىنعا ارنايى كەلگەن الەمدىك دەڭگەيدەگى رۋحاني كوشباسشىلارعا زور العىس ايتامىن.
سونداي-اق، ءبىزدىڭ باستامامىزعا قولداۋ كورسەتكەن ساياساتكەرلەر مەن حالىقارالىق ۇيىم وكىلدەرىنە شىنايى ريزاشىلىعىمدى بىلدىرەمىن. فورۋمدى وتكىزۋگە بەلسەنە اتسالىسقان ديپلوماتتارعا، ۆولونتەرلەرگە، جۋرناليستەر مەن باسقا دا ازاماتتارعا راقمەتىمدى ايتقىم كەلەدى.
وسى ورايدا، اسا ءقادىرلى ريم پاپاسى فرانسيسككە ەلىمىزگە تاريحي ساپارمەن كەلگەنى ءۇشىن قازاقستان حالقىنىڭ جانە جەكە ءوز اتىمنان تاعى دا شىنايى العىس بىلدىرەمىن. سەز جۇمىسىنا ءوزىڭىزدىڭ بەلسەنە قاتىسۋىڭىز – ءبىز ءۇشىن زور مارتەبە. ءسىزدىڭ الەم جۇرتشىلىعىنا ارناعان ۇندەۋىڭىز جەر جۇزىندەگى ميلليونداعان ادامعا ءۇمىت پەن سەنىم سىيلاعانى انىق»، دەدى مەملەكەت باسشىسى.