پرەزيدەنتتىككە ۇمىتكەر اۋەسبايەۆ قازاق تىلىنەن ەمتيحان تاپسىردى

لينگۆيستيكالىق كوميسسيانىڭ وتىرىسى ءوتتى.

پرەزيدەنتتىككە كانديدات نۇرلان اۋەسبايەۆ قازاق تىلىنەن ەمتيحان تاپسىردى، دەپ حابارلايدى Almaty-akshamy.kz

ورتالىق سايلاۋ كوميسسياسىنىڭ (وسك) باسپا ءسوز قىزمەتىنىڭ مالىمەتىنشە، بۇگىن قازاقستان رەسپۋبليكاسى ورتالىق سايلاۋ كوميسسياسىندا نۇرلان ساتىبالدى ۇلى اۋەسبايەۆتىڭ مەملەكەتتىك ءتىلدى ەركىن مەڭگەرگەندىگىن انىقتاۋ بويىنشا لينگۆيستيكالىق كوميسسيانىڭ وتىرىسى وتكەن.

لينگۆيستيكالىق كوميسسيا كانديداتتىڭ مەملەكەتتىك ءتىلدى ەركىن مەڭگەرگەندىگىن ءۇش باعىت بويىنشا انىقتاعان: شىعارما جازۋ، قازاق ادەبيەتى كلاسسيكتەرىنىڭ شىعارماسىنان ءۇزىندى وقۋ، كانديداتتىڭ تاڭداعان تاقىرىبىنا كوپشىلىك الدىندا ءسوز سويلەۋى.

«كانديدات «تۇركىستان - ەر تۇرىكتىڭ بەسىگى» تاقىرىبىنا شىعارما جازدى. جازبا جۇمىسى مازمۇنى، ءستيلى، ەملەسى، تىنىس بەلگىلەرى بويىنشا باعالاندى. ەكىنشى تاپسىرما بويىنشا جۇسىپبەك ايماۋىت ۇلىنىڭ «اقبىلەك» رومانىنان ءۇزىندى وقىدى. ءۇشىنشى تاپسىرما بويىنشا «انا ءتىلىم - اسىل قازىنام» تاقىرىبىنا ويىن اۋىزشا باياندادى. ەمتيحان قورىتىندىسى بويىنشا، لينگۆيستيكالىق كوميسسيا قازاقستان رەسپۋبليكاسىنىڭ پرەزيدەنتتىگىنە كانديدات مەملەكەتتىك ءتىلدى ەركىن مەڭگەرگەندىگى تۋرالى اشىق داۋىسپەن ءبىراۋىزدان شەشىم قابىلدادى»، - دەلىنگەن حابارلامادا.