ەلىمىزدىڭ پرەزيدەنتى قاسىم-جومارت توقايەۆتىڭ قازاقستان حالقىنا كەزەكتى جولداۋى
مەملەكەت باسشىسى قاسىم-جومارت توقايەۆ ءوزىنىڭ قازاقستان حالقىنا كەزەكتى جولداۋىندا ۇلتتىق بانك پەن ۇكىمەتتى ينفلياسيانى 6-4 پايىز دالىزىنە قايتارۋعا مىندەتتەدى، دەپ حابارلايدى Almaty-akshamy.kz قازاقپارات سايتىنا سىلتەمە جاساپ.
«ءبىز ينفلياسيانىڭ باقىلاۋسىز وسىمىنە تاپ كەلدىك. ۇلتتىق بانك، ۇكىمەت ونى الەمدىك تەندەنسيالارعا سىلتەپ، ينفلياسيا الدىندا دارمەنسىز بولىپ شىقتى. مۇنداي سيپاتتاعى جەلەۋلەر ۇلتتىق ەكونوميكانىڭ قاۋقارسىزدىعىن كورسەتەدى. تاعى ءبىر سۇراق تۋىندايدى. سوندا ءبىزدىڭ كاسىبي ەكونوميستەردىڭ ءرولى نەدە؟ ۇلتتىق بانك پەن ۇكىمەتتىڭ باستى مىندەتى – ينفلياسيانى 6-4 پايىز دالىزىنە قايتارۋ»، - دەدى ق ر پرەزيدەنتى.
سونىمەن قاتار، ول ۇلتتىق قوردىڭ اكتيۆتەرىن قالپىنا كەلتىرۋ ءۇشىن بيۋدجەتتىك ەرەجەگە كوشۋدى جەدەلدەتۋدى تاپسىردى.
«سوڭعى كەزدە مەملەكەتتىك شىعىس مىندەتتەمەلەرىن جابۋ ءۇشىن بيۋدجەت تاپشىلىعى مەن ۇلتتىق قوردان الىناتىن ترانسفەرتتىڭ ارتۋ تەندەنسياسى بايقالۋدا. ۇنەمى مۇنداي جەڭىل جولمەن ءجۇرۋ مۇمكىن ەمەس. قارجىلىق تۇراقتىلىق قورى شەكسىز ەمەس. بيۋدجەتتىڭ كىرىسىن ارتتىرۋ بويىنشا شارالار قاجەت ەكەنى انىق. ءبىراق ءبىرىنشى كەزەكتە مەملەكەتتىك شىعىنداردىڭ كولەمى مەن تيىمدىلىگىنە باقىلاۋ كەرەك. ۇلتتىق قور اكتيۆتەرىن قالپىنا كەلتىرۋ ءۇشىن بيۋدجەتتىك ەرەجەنى ەنگىزۋدى جەدەلدەتۋ كەرەك. ءتيىستى زاڭنامالىق تۇزەتۋلەر جىلدىڭ سوڭىنا دەيىن قابىلدانۋى قاجەت»، - دەدى پرەزيدەنت.