مەملەكەت باسشىسى ەنەرگەتيكا جانە ينجەنەرلىك ينفراقۇرىلىمدى دامىتۋ ماسەلەلەرى جونىندە كەڭەس وتكىزدى.
پرەزيدەنت قاسىم-جومارت توقايەۆتىڭ توراعالىعىمەن ەنەرگەتيكا جانە ينجەنەرلىك ينفراقۇرىلىمدى دامىتۋ ماسەلەلەرى جونىندە كەڭەس ءوتتى. جيىنعا پرەمەر-مينيستر ءاليحان سمايىلوۆ، ۇكىمەت مۇشەلەرى، مەملەكەتتىك ورگاندار مەن ۇلتتىق كومپانيالاردىڭ باسشىلارى، وڭىرلەردىڭ اكىمدەرى قاتىستى، دەپ حابارلايدى اlmaty-akshamy.kz
كەڭەسكە قاتىسۋشىلار قازاقستانداعى ەلەكتر ەنەرگەتيكاسى سالاسى مەن اتوم ونەركاسىبىن دامىتۋدىڭ پەرسپەكتيۆالارىن، ەنەرگەتيكالىق تيىمدىلىكتى ارتتىرۋ جانە ەلەكتر ەنەرگياسى تاپشىلىعىن شەشۋ ماسەلەلەرىن قاراستىردى.
سونىمەن قاتار تەڭگەرىمدى تاريف ساياساتىن ەنگىزۋدىڭ ناقتى اسپەكتىلەرى مەن ەلەكتر ەنەرگەتيكاسى جانە ءتۇرعىن-ۇي كوممۋنالدىق شارۋاشىلىعى سالالارىنداعى ءىرى جوبالاردى ىسكە اسىرۋ بارىسى تالقىلاندى.
قاسىم-جومارت توقايەۆ ءتۇرعىن-ۇي كوممۋنالدىق شارۋاشىلىعىن جانە قۋات ءوندىرۋشى ستانسيالاردى جاڭعىرتۋ، جاڭا تەحنولوگيالاردى ەنگىزۋ جانە سالانى سيفرلاندىرۋ، ەلەكتر جەلىلەرىندەگى اپاتتاردى ازايتۋ جونىندە ءبىرقاتار تاپسىرما بەردى. مەملەكەت باسشىسى ەنەرگەتيكا مينيسترلىگى مەن قارجى مونيتورينگى اگەنتتىگىنە قازاقستانداعى زاڭسىز ماينينگ ماسەلەسىن تۇبەگەيلى شەشۋدى تاپسىردى.
جيىن بارىسىندا ەنەرگەتيكا ءمينيسترى بولات اقشولاقوۆ، «سامۇرىق-قازىنا» اكسيونەرلىك قوعامىنىڭ باسقارما ءتوراعاسى الماسادام ساتقالييەۆ، يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ، ۇلتتىق ەكونوميكا ءمينيسترى الىبەك قۋانتىروۆ، باسەكەلەستىكتى قورعاۋ جانە دامىتۋ اگەنتتىگىنىڭ ءتوراعاسى سەرىك جۇمانعارين جانە باسقالار بايانداما جاسادى.