توقايەۆ بالالارعا قاتىستى كەز كەلگەن جازاتايىم جاعداي ءۇشىن ءمۇعالىمدى جازالاۋ ورىنسىز ەكەنىن ايتتى.
پرەزيدەنت «پەداگوگ مارتەبەسى تۋرالى» زاڭعا ۇستاز قۇقىعىن قورعاۋ جونىندە وزگەرىستەر ەنگىزۋدى ۇسىندى.
«ءمۇعالىمنىڭ قۇقىعىن قورعاۋ ماسەلەسى ءاردايىم باستى نازاردا بولۋعا ءتيىس. مەن ءسوز باسىندا ۇستازداردىڭ ءوز مىندەتىنەن تىس جۇمىستاردان بوساتىلعانىن ايتتىم. ءبىراق، كەيدە جەرگىلىكتى بيلىك وكىلدەرى زاڭ تالاپتارىن ورەسكەل بۇزىپ جاتادى. پروكۋراتۋرا ورگاندارى مۇنداي زاڭ بۇزۋشىلىقتارعا توسقاۋىل قويۋى كەرەك
سونداي-اق بالالارعا قاتىستى كەز كەلگەن جازاتايىم جاعداي ءۇشىن دە ءمۇعالىمدى جازالاۋ ورىنسىز دەپ سانايمىن. مەكتەپتەن تىس جەردە، اتا-انالاردىڭ جاۋاپسىزدىعىنان وقىس وقيعا بولسا، وعان ۇستاز جاۋاپتى ەمەس. الماتى وبلىسىندا تۇلەكتەر اراسىندا بولعان قايعىلى جاعداي ءۇشىن ديرەكتور مەن مۇعالىمدەر جاۋاپقا تارتىلىپ، جۇمىستان شىعارىلدى. مينيسترلىك ولاردىڭ مۇددەسىن قورعاپ قالدى. دۇرىس. ءبىز مۇنداي كەلەڭسىزدىككە جول بەرمەۋىمىز كەرەك.
«پەداگوگ مارتەبەسى تۋرالى» زاڭعا ۇستاز قۇقىعىن قورعاۋ جونىندە وزگەرىستەر ەنگىزۋ قاجەت دەپ سانايمىن. مەملەكەتتىڭ مىندەتى – ءمۇعالىمنىڭ قوعامداعى بەدەلىن جانە مارتەبەسىن مەيلىنشە ارتتىرۋ.
تاعى ءبىر ماسەلە. ماڭعىستاۋدا بالالار ساپاسىز تاماقتان ۋلانىپ قالعانىن بىلەسىزدەر. وسى سۇمدىق جاعدايدان كەيىن مەكتەپتەگى تاماقتىڭ ساپاسىن قاداعالاۋ جۇمىسىن دەنساۋلىق ساقتاۋ مينيسترلىگى تولىعىمەن ءوز مىندەتىنە الدى. بۇل وتە دۇرىس شەشىم بولدى. جالپى، ءبىلىم سالاسى – مەملەكەت ءۇشىن ستراتەگيالىق ءمانى بار سالا. سوندىقتان، قۇزىرلى مەملەكەتتىك ورگاندار ءبىلىم سالاسىنداعى ماسەلەلەردەن سىرت قالماۋى كەرەك»، - دەدى پرەزيدەنت.