قاسىم-جومارت توقايەۆ پويىزدىڭ تامبۋرىندا ۇلتتىق ۇلان ساربازىن بەلگىسىز ادامداردىڭ سوققىعا جىعىلعان ۆيدەوجازباسىمەن تانىسىپ، كىنالىلەردى جازاعا تارتۋدى تاپسىردى. بۇل تۋرالى پرەزيدەنتتىڭ كەڭەسشىسى — باسپا ءسوز حاتشىسى بەرىك ءۋالي حابارلادى.
بەرىك ءۋاليدىڭ ايتۋىنشا، توقايەۆ ىشكى ىستەر ءمينيسترى ەرجان سادەنوۆكە قۇقىقبۇزۋشىلاردى ۇستاپ، قازاقستاندىق زاڭناماعا سايكەس جاۋاپكەرشىلىككە تارتۋ بويىنشا شۇعىل شارالار قابىلداۋدى تاپسىرعان.
«ارميادا جانە باسقا دا كۇش قۇرىلىمدارىندا ورىن العان بارلىق زورلىق-زومبىلىق فاكتىلەرى مەملەكەت باسشىسىنىڭ باقىلاۋىندا. پرەزيدەنت 2 قىركۇيەكتەگى جولداۋىندا جاس ساربازداردىڭ دەنساۋلىعى مەن ابىرويىنا نۇقسان كەلتىرۋدى بولدىرماۋ قاجەتتىگىن اتاپ ءوتىپ، وسى ماسەلەدە بارلىق جاۋاپكەرشىلىك اسكەري بولىمدەر كومانديرلەرىنە جۇكتەلەتىنىن قاداپ ايتتى»، — دەپ جازدى ءۋالي.
ىشكى ىستەر مينيسترلىگىنىڭ مالىمەتىنشە، وقيعا 2023 جىلدىڭ كۇزىندە، اسكەري قىزمەتىن اياقتاپ، زاپاستاعى ساربازدار ۇيلەرىنە قايتىپ كەلە جاتقان كەزدە ورىن العان.
«23 قىركۇيەكتە قازاقستان رەسپۋبليكاسى قىلمىستىق كودەكسىنىڭ 440-بابى بويىنشا "اسكەري قىزمەتشىلەر اراسىنداعى جارعىعا ساي ەمەس قارىم-قاتىناستاردى بۇزۋ" فاكتىسىمەن قىلمىستىق ءىس قوزعالدى. كۋاگەرلەر، جابىرلەنۋشى جانە كۇدىكتىلەر انىقتالدى. كۇدىكتىلەردى ۇستاۋعا باعىتتالعان شارالار كەشەنى قابىلداندى. تەرگەۋ ىشكى ىستەر ءمينيسترىنىڭ جەكە باقىلاۋىندا»، — دەلىنگەن مالىمدەمەدە.