مەملەكەت باسشىسىنا ولجاس بەكتەنوۆ ەلىمىزدىڭ الەۋمەتتىك-ەكونوميكالىق دامۋ كورسەتكىشتەرى، ەگىن وراعى جانە جىلىتۋ ماۋسىمىنا دايىندىق بارىسى تۋرالى اقپارات بەردى، دەپ حابارلايدى aqshamnews.kz.
ۇكىمەت باسشىسى بيىلعى قاڭتار-تامىز ايلارى ارالىعىندا ەكونوميكانىڭ ءوسىمى 3،7 پايىزدى قۇراعانىن، قۇرىلىس (8،8%)، كولىك جانە قويما ءىسى (7،9%)، بايلانىس (7،4%)، ساۋدا (5،5%)، وڭدەۋ ونەركاسىبى (4،9%) سەكتورلارىنداعى كورسەتكىش ەداۋىر جاقسارعانىن ايتتى.
سونىمەن قاتار، اۋىل شارۋاشىلىعىن جەڭىلدىكپەن قارجىلاندىرۋ كولەمى 3 ەسە ۇلعايىپ، 580 ميلليارد تەڭگەگە جەتكەن. بۇگىندە ەلىمىز بويىنشا ءداندى جانە بۇرشاقتى داقىلدار القابىنىڭ 70،2 پايىزى جينالىپ، 17،2 ميلليون توننا استىق باستىرىلعان. ديقاندار ارزان جانار-جاعارمايمەن جەتكىلىكتى مولشەردە قامتاماسىز ەتىلگەنىنە توقتالدى.
بارلىق وڭىردە الداعى جىلىتۋ ماۋسىمىنا دايىندىق جۇمىستارى جۇرگىزىلىپ جاتقانى جونىندە باياندادى. اسىرەسە، الەۋمەتتىك نىسانداردىڭ دايىندىعى جوعارى دەڭگەيدە ەكەنىنە توقتالدى. تۇرعىن ۇيلەردى جىلىتۋ ماۋسىمىنا ازىرلەۋ جۇمىستارى 98،3 پايىزعا ورىندالعانىن جەتكىزدى. ەلەكتر ستانسيالارىنا جىل سايىن 60 ميلليون توننا كومىر قاجەت. ءقازىر ونىڭ قاجەتتى قورى بار ەكەنىن ايتتى.
سۋ تاسقىنى سالدارىن جويۋ جونىندەگى بۇعان دەيىن بەرىلگەن تاپسىرمالارىنىڭ ورىندالۋ بارىسى مەن كەلەسى جىلى سۋ تاسقىنى جاعدايىنىڭ الدىن الۋ شارالارى تۋرالى ايتتى. زارداپ شەككەندەردىڭ بارلىعىنا الەۋمەتتىك قولداۋ كورسەتىلىپ، بۇلىنگەن دۇنيە-مۇلكى ءۇشىن وتەماقى تولەنگەن. باسپاناسىنان ايىرىلعاندارعا 5767 تۇرعىن ءۇي ساتىپ الىندى جانە 2576 جاڭا ءۇي سالىنعان. اقمولا مەن باتىس قازاقستان وبلىستارىنداعى 104 نىساندا جۇمىس اياقتالۋعا جاقىن. سۋ تاسقىنىنا قارسى ءىس-شارالار جوسپارى جۇزەگە اسىرىلىپ جاتقانى تۋرالى باياندادى.
مەملەكەت باسشىسى ەلىمىزدىڭ ونەركاسىپ الەۋەتىن ودان ءارى ارتتىرۋ جانە ينفراقۇرىلىمدى جاڭعىرتۋ جونىندە ءبىرقاتار تاپسىرما بەردى.