پرەزيدەنت ۇلتتىق قاۋىپسىزدىك كوميتەتىنىڭ ءتوراعاسىن قابىلدادى

ۇلتتىق قاۋىپسىزدىك كوميتەتىنىڭ بولىمشەلەرى ءبىرقاتار لاڭكەستىك قىلمىستىڭ، سونىڭ ىشىندە قولدان جاسالعان جارىلعىش قۇرىلعىنى قولدانۋ ارقىلى حالىق كوپ جينالاتىن ورىنداردىڭ بىرىندە جاسالماق بولعان تەرروريستىك اكتىگە توسقاۋىل قويىلعانى جونىندە باياندادى. بەرىلگەن مالىمەت بويىنشا 19 ادام قاماۋعا الىنعان، - دەلىنگەن حابارلامادا.

تەرروريزمگە قارسى ورتالىق شتابىنىڭ جۇمىسىن ۇيلەستىرۋ كەزىندە تەررورلىق قاتەرلەرگە قارسى ىس-ارەكەت شارالارىن جەتىلدىرۋ ءۇشىن جاتتىعۋ جيىندارى مەن دايىندىقتار وتكىزىلگەنىن حابارلادى. شەت مەملەكەتتەردىڭ ارناۋلى قىزمەتتەرىنىڭ بارلاۋ ارەكەتتەرىنە قارسى ءىس-قيمىل وپەراسيالارى جۇزەگە اسىرىلعان. 

انىقتالعان ءبىرقاتار فاكتى بويىنشا سوتقا دەيىنگى تەرگەۋ امالدارى جۇرگىزىلىپ جاتىر. قۇقىق قورعاۋ ورگاندارىمەن بىرلەسە جۇرگىزگەن كريمينوگەندىك جاعدايدى ساۋىقتىرۋ جۇمىستارىنىڭ ناتيجەسى تۋرالى باياندادى.

بيىلعى ءتورت ايدا:

 ۇقك 8 ءقاۋىپتى ۇيىمداسقان قىلمىستىق توپتى قۇرىقتاعان؛ 

قارۋ-جاراق پەن ءوق-دارى جاساۋعا قاتىستى 7 جاسىرىن سەح جويىلعان؛ 

زاڭسىز اينالىمنان 268 قارۋ، 21 گراناتا جانە 30 مىڭنان استام ءوق-دارى تاركىلەنگەن؛ 

16 ەسىرتكى لابوراتورياسىنىڭ، 11 حالىقارالىق جانە 17 وڭىرلىك ەسىرتكى كانالىنىڭ جۇمىسى توقتاتىلعان؛ 

مەملەكەتتىك شەكارانى كۇزەتۋ سالاسىندا 6 987 زاڭ بۇزۋشى ۇستالعان. 

شامامەن 2،8 ميلليارد تەڭگە كولەمىندە ۆاليۋتا، التىن جانە باسقا دا تاۋارلاردىڭ زاڭسىز تاسىمالدانۋىنا جول بەرىلمەگەن. قارۋ مەن وق-دارىلەردى تاسىمالداۋعا قاتىستى 85 ارەكەتتىڭ جولى كەسىلگەن؛ زاڭسىز كوشى-قون بويىنشا 4 ارناعا توسقاۋىل قويىلىپ، ولاردىڭ 6 ۇيىمداستىرۋشىسى ۇستالعان؛ ۇلتتىق قاۋىپسىزدىك كوميتەتىنىڭ تەحنيكالىق بولىمشەلەرى 37،9 ميلليوننان استام كيبەرشابۋىلدى جانە ەلدىڭ ماڭىزدى ينفراقۇرىلىم نىساندارىنا باعىتتالعان 1948 DDoS-شابۋىلعا تويتارىس بەرگەن.

 پرەزيدەنت ۇلتتىق قاۋىپسىزدىك ورگاندارى قىزمەتىنىڭ باعىتتارى بويىنشا ءبىرقاتار ناقتى تاپسىرما بەردى.