كاسىپكەرلىكتى دامىتۋدىڭ نەگىزگى باعىتتارىنا نازار اۋدارىلدى.
پرەزيدەنت «اتامەكەن» ۇكپ پرەزيديۋمىنىڭ ءتوراعاسى رايىمبەك باتالوۆتى قابىلدادى، دەپ حابارلايدى Almaty-akshamy.kz اقوردانىڭ باسپا ءسوز قىزمەتىنە سىلتەمە جاساپ.
مەملەكەت باسشىسىنا وتاندىق كاسىپكەرلىكتى قولداۋ جانە دامىتۋ جونىندە اتقارىلىپ جاتقان جۇمىستار، مەملەكەت پەن بيزنەس اراسىنداعى ىنتىماقتاستىق، ۇلتتىق كاسىپكەرلەر پالاتاسىن ترانسفورماسيالاۋدىڭ نەگىزگى باعىتتارى تۋرالى باياندالدى.
رايىمبەك باتالوۆ پالاتانىڭ فۋنكسياسىنا جاتپايتىن قىزمەتتەرگە تالداۋ جاسالىپ، قىسقارتىلعانىن، ولاردىڭ باسەكەلىك ورتاعا بەرىلگەنىن، سونداي-اق ۇلتتىق كاسىپكەرلەر پالاتاسىنىڭ بيۋدجەت باعدارلاماسىنا تاۋەلدىلىگى تۇبەگەيلى ازايعانىن جەتكىزدى.
كەزدەسۋ بارىسىندا ەلىمىزدەگى كاسىپكەرلىكتى دامىتۋدىڭ نەگىزگى باعىتتارىنا ەرەكشە نازار اۋدارىلدى.
جوعارى الەۋمەتتىك جاۋاپكەرشىلىك، ادالدىق، سالىق ادالدىعى، ەكولوگيالىق تالاپتاردى ساقتاۋ جانە باسقا ماڭىزدى قاعيداتتاردى بەرىك ۇستاناتىن كاسىپكەرلەردىڭ جاڭا بۋىنى پايدا بولۋ ءۇشىن جاعداي جاساۋ قاجەتتىگى ايتىلدى.
قازىرگى ۋاقىتتا پالاتا مەيلىنشە جەدەل شەشۋدى قاجەت ەتەتىن جانە ستراتەگيالىق باسىمدىققا يە ماسەلەلەردى انىقتاۋ ءۇشىن تەرەڭ تالداۋ جۇرگىزىپ جاتىر.
اتالعان تۇيتكىلدەردىڭ ۇكىمەتپەن جانە اكىمدىكتەرمەن تىعىز سەرىكتەستىكتە شەشىلۋى ەكونوميكانى ءتيىمدى ءارتاراپتاندىرۋعا، جاڭا ەكونوميكالىق ساياساتتى جۇزەگە اسىرۋعا جانە قولايلى بيزنەس احۋال قالىپتاستىرۋعا سەپتىگىن تيگىزەدى.
پرەزيدەنت ۇلتتىق كاسىپكەرلەر پالاتاسىنىڭ ەسەبىن تىڭداپ، ستراتەگيالىق شەشىمدەر قابىلداۋ كەزىندە بيزنەستىڭ مۇددەسىن ەسكەرۋ ماڭىزدى ەكەنىن، سونداي-اق وتاندىق كاسىپكەرلىكتى دامىتۋدى ىنتالاندىرۋ ءۇشىن ۇسىنىلعان شارالار مەن «اتامەكەندى» ترانسفورماسيالاۋ تاسىلدەرىنىڭ وزەكتىلىگىن اتاپ ءوتتى.