پرەزيدەنتكە ەلىمىزدىڭ بيىلعى 6 ايداعى الەۋمەتتىك-ەكونوميكالىق دامۋ قورىتىندىسى، سونداي-اق ماڭعىستاۋ اتوم ەنەرگەتيكالىق كومبيناتىندا (ماەك) جانە اتىراۋ مۇناي وڭدەۋ زاۋىتىندا (ءاموز) بولعان اپاتتاردىڭ سەبەپتەرىن تەكسەرۋ ناتيجەلەرى جونىندە باياندالدى.
ءاليحان سمايىلوۆتىڭ ايتۋىنشا، باتىس ءوڭىرىنىڭ ەنەرگەتيكا جۇيەسىنىڭ جاي-كۇيىنە جاسالعان اۋقىمدى تالداۋ ناتيجەسىندە ەنەرگەتيكا كاسىپورىندارىنىڭ جۇمىسىندا ءبىرقاتار كەمشىلىك جىبەرىلگەنى انىقتالدى. بۇدان بولەك، ەنەرگەتيكا مينيسترلىگىنىڭ، «KEGOC» اق، «ماەك» ج ش س جانە «قازمۇنايگاز» ۇك» اق جۇمىسىندا ولقىلىقتار بار ەكەنى ءمالىم بولدى، دەپ حابارلايدى Almaty-akshamy.kz اقورداعا سىلتەمە جاساپ.
«قازمۇنايگاز» ۇك» اق باسقارما ءتوراعاسى ماعزۇم مىرزاعالييەۆكە مۇناي وڭدەۋ زاۋىتىنىڭ ءقاۋىپسىز جانە تۇراقتى جۇمىسىن قامتاماسىز ەتۋ شارالارىن ۋاقتىلى جۇزەگە اسىرماعانى ءۇشىن سوگىس بەرىلەدى.
بۇدان بولەك، باتىس ەنەرگيا تورابىنىڭ قاۋىپسىزدىگىنە ءتيىستى دەڭگەيدە باقىلاۋ جاساماعانى ءۇشىن ەنەرگەتيكا ۆيسە-مينيسترى جاندوس نۇرماعانبەتوۆكە سوگىس جاريالاۋ جونىندە شەشىم قابىلداندى. سونداي-اق «ماەك» ج ش س، ءاموز، «KEGOC» اق باسشىلارى مەن لاۋازىمدى تۇلعالارىنا قاتىستى اكىمشىلىك سيپاتتاعى شارالار قولدانىلادى.
ۇكىمەت كەلەشەكتە مۇنداي داعدارىس جاعدايلارىنا جول بەرمەۋ ءۇشىن ماڭعىستاۋ اتوم ەنەرگەتيكالىق كومبيناتىنا جاڭعىرتۋ جانە كۇردەلى جوندەۋ جۇرگىزۋ، باتىس ەنەرگەتيكالىق ايماعىن كۇشەيتۋ، اتىراۋ مۇناي وڭدەۋ زاۋىتىن سىرتقى ەلەكتر قۋاتىمەن تۇراقتى قامتاماسىز ەتۋ جانە سول جەردە ءوزىن-وزى ەنەرگيامەن قامتاماسىز ەتەتىن ستانسا سالۋ، باتىس ايماعىن قازاقستاننىڭ ءبىرىڭعاي ەلەكترەنەرگەتيكالىق جۇيەسىنە قوسۋ جۇمىستارىن جانە باسقا دا ءبىرقاتار شۇعىل جانە جۇيەلى شارالاردى جۇزەگە اسىرادى.
سونىمەن قاتار مەملەكەت باسشىسىنا ۆەگەتاسيالىق كەزەڭى سۋ تاپشىلىعى جاعدايىندا ءوتىپ جاتقان وڭتۇستىك وڭىرلەردى سۋمەن قامتاماسىز ەتۋ ماسەلەسى تۋرالى مالىمەت بەرىلدى.
وسىعان بايلانىستى ۇكىمەت پەن جەرگىلىكتى اتقارۋشى ورگاندار قاجەتتى شارالار قابىلداپ جاتىر.
اتاپ ايتقاندا، سۋمەن قامتاماسىز ەتۋ ءۇشىن سۋارمالى اۋىل شارۋاشىلىعى داقىلدارىنىڭ قايسىسىنا باسىمدىق بەرىلەتىنى انىقتالادى، سۋاينالىم ءادىسى قولدانىلادى. بۇدان بولەك، سۋ ۇنەمدەۋ تەحنولوگياسىن ەنگىزۋ جۇمىستارى بەلسەندى جۇزەگە اسىرىلۋدا.
ارنالارداعى سۋ شىعىنىن ازايتۋ جانە جيناقتالاتىن سۋ مولشەرىن كوبەيتۋ ءۇشىن گيدروتەحنيكالىق قۇرىلىستارعا كۇردەلى جوندەۋ جۇمىستارى جۇرگىزىلىپ جاتىر.
سونداي-اق پرەمەر-مينيستر ءاليحان سمايىلوۆ «ءتاريفتى ينۆەستيسياعا ايىرباستاۋ» باعدارلاماسىن جۇزەگە اسىرۋعا، كوممۋنالدىق ينفراقۇرىلىمدى جاڭعىرتۋعا جانە كيىكتەر پوپۋلياسياسىن ورنىقتى باسقارۋعا قاتىستى قابىلدانىپ جاتقان شارالار جونىندە باياندادى.