پرەزيدەنت تۇرىكمەنستان مينيسترلەر كابينەتى ءتوراعاسىنىڭ ورىنباسارىن قابىلدادى

مەملەكەت باسشىسى اوسشك سىرتقى ىستەر مينيسترلەرى كەڭەسىنىڭ  التىنشى وتىرىسىنا قاتىسۋ ءۇشىن ەلىمىزگە كەلگەن تۇرىكمەنستان مينيسترلەر كابينەتى ءتوراعاسىنىڭ ورىنباسارى – سىرتقى ىستەر ءمينيسترى راشيد مەرەدوۆتى قابىلدادى، دەپ حابارلايدى Almaty-akshamy.kz. اkorda.kz-كە سىلتەمە جاساپ.

مەملەكەت باسشىسى تۇرىكمەنستان وتكىزگەن ورتالىق ازيا مەملەكەتتەرى باسشىلارىنىڭ ءۇشىنشى كونسۋلتاتيۆتىك كەزدەسۋىندە ىنتىماقتاستىقتى ودان ءارى كۇشەيتۋ ءارى جاڭا مۇمكىندىكتەرگە جول اشۋ ماقساتىمەن وزەكتى ماسەلەلەر تالقىلانعانىن اتاپ ءوتتى. قاسىم-جومارت توقايەۆ تۇرىكمەنستاندىق ديپلوماتقا اوسشك سىرتقى ىستەر مينيسترلەرى كەڭەسىنىڭ التىنشى وتىرىسىنا قاتىسىپ، قازاقستاننىڭ باستامالارىنا قولداۋ كورسەتكەنى ءۇشىن ريزاشىلىعىن ءبىلدىردى.

كەزدەسۋدە قازاقستان-تۇرىكمەنستان قارىم-قاتىناسىنىڭ ساياسي، ساۋدا-ەكونوميكالىق سالالارى مەن ايماقتىق قاۋىپسىزدىك ماسەلەلەرى تالقىلاندى. سونىمەن قاتار تۇرىكمەنستاندا وتەتىن VI كاسپيي سامميتىنە دايىندىق بارىسى قاراستىرىلدى.

راشيد مەرەدوۆ قازاقستان پرەزيدەنتىنە قابىلداعانى ءۇشىن العىس ءبىلدىرىپ، تۇرىكمەنستان پرەزيدەنتى گۋربانگۋلى بەردىمۇحامەدوۆتىڭ ءوز ەلىنە مەملەكەتتىك ساپارمەن كەلۋگە شاقىرۋىن تابىس ەتتى.

قاسىم-جومارت توقايەۆ شاقىرتۋدى قابىل الاتىنىن ايتىپ، قازاق-تۇرىكمەن ىنتىماقتاستىعىنا بارلىق سالا بويىنشا تىڭ سەرپىن بەرۋ ماقساتىندا جۋىق ارادا اشحابادقا ساپارمەن باراتىنىن جەتكىزدى.