سەردار بەردىمۇحامەدوۆ قاسىم-جومارت توقايەۆقا شاقىرۋىن قابىل العانى ءۇشىن ريزاشىلىعىن ءبىلدىردى.
مەملەكەت باسشىسى قاسىم-جومارت توقايەۆ تۇرىكمەنستان پرەزيدەنتى سەردار بەردىمۇحامەدوۆپەن كەزدەستى، دەپ حابارلايدى Almaty-akshamy.kz اقورداعا سىلتەمە جاساپ.
اشحابادتا ۇيىمداستىرىلىپ جاتقان التىنشى كاسپيي سامميتىنە قاتىسۋعا كەلگەن مەملەكەت باسشىسى قاسىم-جومارت توقايەۆ تۇرىكمەنستان پرەزيدەنتى سەردار بەردىمۇحامەدوۆپەن كەزدەسۋ وتكىزدى.
قازاقستان پرەزيدەنتى، ەڭ الدىمەن، تۇرىكمەن جەرىندەگى ءداستۇرلى قوناقجايلىعى ءۇشىن ريزاشىلىعىن ءبىلدىردى. بۇل – سەردار بەردىمۇحامەدوۆ پرەزيدەنت بولىپ سايلانعاننان كەيىنگى ەكى ەل باسشىلارىنىڭ العاشقى بەتپە-بەت كەزدەسۋى. وسىعان وراي مەملەكەت باسشىسى تۇرىكمەنستاننىڭ جاڭا پرەزيدەنتىن سايلاۋداعى جەڭىسىمەن قۇتتىقتادى.
سونىمەن قاتار قاسىم-جومارت توقايەۆ بۇگىن اشحابادتا وتەتىن التىنشى كاسپيي سامميتىنە ەرەكشە ءمان بەرەتىنىن جەتكىزدى. قازاقستان پرەزيدەنتى ءسامميتتىڭ ناتيجەسى كاسپيي ماڭى مەملەكەتتەرىنىڭ دوستىق پەن تاتۋ كورشىلىك بايلانىستارىن ودان ءارى نىعايتۋعا ەلەۋلى ۇلەس قوسىپ، ءوزارا ءتيىمدى ىنتىماقتاستىقتىڭ كوكجيەگىن كەڭەيتەتىنىنە سەنىم ءبىلدىردى.
سەردار بەردىمۇحامەدوۆ قاسىم-جومارت توقايەۆقا شاقىرۋىن قابىل العانى ءۇشىن ريزاشىلىعىن ءبىلدىرىپ، وسى سامميتكە قاتىستى ويىن ايتتى. تۇرىكمەنستان پرەزيدەنتى بارىمىزگە ورتاق كاسپييدىڭ يگىلىگى ءۇشىن بۇگىن كەلەلى باسقوسۋ بولاتىنىن جەتكىزدى.