ەرەن ەڭبەكتەرى جوعارى باعاعا لايىق.
19 قازان كۇنى قازاقستاندا قۇتقارۋشىلار كۇنى اتالىپ وتەدى. قازاقستان پرەزيدەنتى قاسىم-جومارت توقايەۆ وتاندىق قۇتقارۋشىلاردى كاسىبي مەيرامىمەن قۇتتىقتادى، دەپ حابارلايدى Almaty-akshamy.kz اقوردانىڭ باسپا ءسوز قىزمەتىنە سىلتەمە جاساپ.
«قۇرمەتتى دوستار!
بارشاڭىزدى قازاقستان رەسپۋبليكاسىنىڭ «قۇتقارۋشى كۇنى» كاسىبي مەرەكەسىمەن قۇتتىقتايمىن!
سىزدەر ءوز ومىرلەرىڭىزدى قاتەرگە تىگىپ، ۇنەمى توتەنشە جاعدايدا جۇمىس ىستەپ جۇرسىزدەر. بۇل مارتەبەلى مىندەتتى ابىرويمەن اتقارىپ كەلەسىزدەر.
ماماندىققا ادالدىق تانىتۋ، ەرلىككە جانە كەز-كەلگەن سىناققا دايىن بولۋ – توتەنشە جاعداي قىزمەتى ماماندارىنا قويىلاتىن باستى تالاپ. تابيعي جانە تەحنوگەندى اپاتتار كەزىندە، كۇندەلىكتى سىن ساتتە سىزدەرگە ۇلكەن جاۋاپكەرشىلىك جۇكتەلەدى.
حالقىمىزدىڭ يگىلىگى مەن تابيعاتىمىزدىڭ قۇندىلىقتارىن ءتۇرلى قاۋىپ-قاتەردەن قورعاپ، بۇگىنگە دەيىن مىڭداعان ادامنىڭ عۇمىرىن ساقتاپ قالدىڭىزدار. سوندىقتان ەرەن ەڭبەكتەرىڭىز ەڭ جوعارى باعاعا لايىق.
سىزدەر الداعى ۋاقىتتا دا قىزمەتتىك بورىشتارىڭىزدى ءمىنسىز اتقارىپ، ەل الدىنداعى ماڭىزدى ميسسيانى جالعاستىرا بەرەسىزدەر دەپ سەنەمىن.
جاۋاپتى جۇمىستارىڭىزعا تابىس، وتباسىلارىڭىزعا اماندىق تىلەيمىن!»، - دەلىنگەن قۇتتىقتاۋدا.