كۇزەت قىزمەتىنىڭ جاڭا باستىعىن تانىستىردى.
مەملەكەت باسشىسى قاسىم-جومارت توقايەۆ مكق باسشىلىق قۇرامىنا جينالىس وتكىزىپ، مەملەكەتتىك كۇزەت قىزمەتىنىڭ جاڭادان تاعايىندالعان باستىعى ەرمەك ساعىمبايەۆتى تانىستىردى، دەپ حابارلايدى Almaty-akshamy.kz Akorda.kz سىلتەمە جاساپ.
پرەزيدەنت مەملەكەتتىك كۇزەت قىزمەتىنىڭ ۇلكەن جاۋاپكەرشىلىگى مەن ماڭىزدىلىعىنا توقتالىپ، بارلىق قىزمەتكەرلەردەن، اسىرەسە، باسشىلىقتان ەرەكشە ءبىلىم مەن بىلىكتىلىك تالاپ ەتىلەتىنىن ايتتى.
«مەملەكەتتىك كۇزەت قىزمەتىنىڭ ماماندارىنان كاسىبيلىك تالاپ ەتىلەدى. بىرىنشىدەن، جاۋىنگەرلىك جانە دەنە دايىندىعى. بۇل رەتتە مەملەكەتتىك كۇزەت قىزمەتىنىڭ، ءتيىستى بولىمشەلەردىڭ باسشىلارى جان-جاقتى ءبىلىمدى، دۇنيەتانىمى كەڭ، ەلدىڭ ىشكى ساياسي جاعدايىن دا، حالىقارالىق احۋالدى دا جاقسى مەڭگەرگەن بولۋى كەرەك. ولاردىڭ حالىقارالىق تالاپتاردىڭ قىر-سىرىن جەتىك بىلەتىن زەرەك، تالداۋ جۇمىستارىنا قابىلەتتى بولعانى ءجون. ءبىز تەك وسىنداي جاعدايدا عانا جۇمىستان ءتيىمدى ناتيجە كۇتەمىز»، – دەدى قاسىم -جومارت توقايەۆ.
پرەزيدەنت كادرلىق الەۋەتتى ارتتىرۋ تۋرالى ايتا كەلىپ، مكق وفيسەرلەرى مەملەكەتكە، وزدەرىنە جۇكتەلگەن قىزمەتكە ادال جانە ناعىز پاتريوتتار بولۋى كەرەك ەكەنىن اتاپ ءوتتى. مەملەكەت باسشىسى كادرلاردى ىرىكتەۋدە ءدال وسى ۇستانىمداردى باسشىلىققا الۋدى باسا ايتتى.
سونداي-اق قاسىم-جومارت توقايەۆ مەملەكەتتىك كۇزەت قىزمەتى باستىعىنىڭ جاڭا ورىنباسارى باتىربەك بايبوسىنوۆتى دا تانىستىردى.
مەملەكەت باسشىسى جيىن سوڭىندا جاڭا باستىق پەن بارلىق وفيسەرلەرگە قىزمەتتە تابىس تىلەدى.