ماجار حالقىنا مول باقىت پەن قۇت-بەرەكە تىلەدى.
قازاقستان پرەزيدەنتى قاسىم-جومارت توقايەۆ ۆيكتور ورباندى «فيدەس – حريستيان-دەموكراتيالىق حالىق پارتياسى» كواليسياسىنىڭ پارلامەنتتىك سايلاۋداعى ايقىن جەڭىسىمەن جانە ماجارستان پرەمەر-مينيسترى بولىپ قايتا سايلانۋىمەن قازاقستان حالقىنىڭ جانە جەكە ءوز اتىنان قۇتتىقتادى، دەپ حابارلايدى Almaty-akshamy.kz اقورداعا سىلتەمە جاساپ.
«سايلاۋداعى جەڭىسىڭىز – وتانداستارىڭىزدىڭ سىزگە جانە ءوزىڭىز باسقارىپ وتىرعان پارتيانىڭ ماجارستاننىڭ ساياسي-ەكونوميكالىق تۇراقتىلىعىن قامتاماسىز ەتۋگە، ازاماتتارىنىڭ ىرىس-بەرەكەسىن ەسەلەۋگە جانە ونىڭ حالىقارالىق بەدەلىن نىعايتۋعا باعىتتالعان سارالى ساياساتىڭىزعا كورسەتكەن كەڭ قولداۋىنىڭ ايعاعى ەكەنى ءسوزسىز. وتانىڭىزدىڭ مۇددەسى مەن جارقىن بولاشاعى ءۇشىن ءسىڭىرىپ جۇرگەن قاجىرلى ەڭبەگىڭىزگە، قولعا العان تىڭ باستامالارىڭىز بەن ماڭىزدى جوسپارلارىڭىزعا ساتتىلىك ءارقاشان سەرىك بولۋىنا تىلەكتەستىگىمدى بىلدىرەمىن»، – دەپ جازىلعان قۇتتىقتاۋ جەدەلحاتتا.
مەملەكەت باسشىسى قازاقستان مەن ماجارستان اراسىنداعى مازمۇندى ساياسي ديالوگ پەن ءداستۇرلى دوستىقتان سەرپىن الاتىن ستراتەگيالىق ارىپتەستىك بىرلەسكەن كۇش-جىگەرىمىز بەن ۇكىمەتتەرىمىز دەڭگەيىندەگى بەلسەندى بايلانىستاردىڭ ارقاسىندا ودان ءارى بەكي تۇسەتىنىنە كامىل سەنىمدى ەكەنىن جەتكىزدى.
«وسى تۇستا قازاق-ماجار ىقپالداستىعىنىڭ بيىك قارقىنىن ساقتاۋعا ەرەكشە ءمان بەرە وتىرىپ، سان قىرلى باعىتتارداعى ىس-ارەكەتتەستىگىمىزدى كۇشەيتۋ جولدارىن تالقىلاۋ ماقساتىندا، ءوزارا قولايلى ۋاقىتتا ءسىزدى قازاقستانعا رەسمي ساپارمەن كەلۋگە شاقىرامىن»، – دەلىنگەن پرەزيدەنتتىڭ قۇتتىقتاۋىندا.
قاسىم-جومارت توقايەۆ ماجارستان پرەمەر-مينيسترىنىڭ اسا جاۋاپتى قىزمەتىنە تولاعاي تابىستار، ال باۋىرلاس ماجار حالقىنا مول باقىت پەن قۇت-بەرەكە تىلەدى.