پرەزيدەنت توقايەۆ اۋىل شارۋاشىلىعى تاۋارلارىن وندىرۋشىلەرمەن كەزدەستى

مەملەكەت باسشىسى رۋدنىي قالاسىنداعى «جاس-قانات 2006» قۇس فابريكاسىنا باردى.

مەملەكەت باسشىسى رۋدنىي قالاسىنداعى «جاس-قانات 2006» قۇس فابريكاسىنا بارىپ، شارۋاشىلىققا زاماناۋي تەحنولوگيالاردى ەنگىزۋ جونىندەگى پيلوتتىق جوبانىڭ جۇزەگە اسىرىلۋ بارىسىمەن تانىستى، دەپ حابارلايدى اlmaty-akshamy.kz اقورداعا سىلتەمە جاساپ.

قۇس فابريكاسىندا وندىرىلەتىن ءونىم ەلىمىزدىڭ بارلىق وڭىرلەرىندە ساتىلادى، سونداي-اق تمد ەلدەرىنە ەكسپورتتالادى.

سەحتىڭ قۋاتى جىلىنا 260 ميلليون دانا جۇمىرتقا جانە 500 توننادان استام ەت ونىمدەرىن وندىرۋگە جەتەدى. بىلتىر 517 توننا ەت جانە 199،1 ميلليون دانا جۇمىرتقا ءوندىرىلدى.

وندىرىستىك قۋاتى ساعاتىنا 120 مىڭنان استام جۇمىرتقا شىعارۋعا جەتەتىن سۇرىپتاۋ، ولشەۋ جانە ماركەرلەۋ سەحىنداعى Nabel تەحنولوگياسى كورسەتىلدى.

ءوندىرىستىڭ اۆتوماتتاندىرىلۋى 8 ساعاتتا ميلليونعا دەيىن جۇمىرتقا تاسىمالداۋعا جانە وراۋعا مۇمكىندىك بەرەدى.

پرەزيدەنتكە وبلىس اكىمى قۇمار اقساقالوۆ ءوڭىردىڭ ونەركاسىپتىك جانە اگرارلىق الەۋەتى جونىندە مالىمەت بەردى. اتاپ ايتقاندا، قاسىم-جومارت توقايەۆ اق اۋىل شارۋاشىلىعى سالاسىنداعى پەرسپەكتيۆتى جوبالارمەن تانىستى.

وسىدان كەيىن مەملەكەت باسشىسى اۋىل شارۋاشىلىعى تاۋارىن وندىرۋشىلەرمەن اڭگىمەلەستى. قاسىم-جومارت توقايەۆ قازاقستان پرەزيدەنتى لاۋازىمىنا قايتا سايلانعاننان كەيىن، ەڭ الدىمەن اۋىل مەن اۋىلدىق اۋماقتاردى دامىتۋ تۋرالى جارلىققا قول قويعانىن ايتتى. سونداي-اق، اۋىل شارۋاشىلىعى مەن اۋىلداردى دامىتۋعا 1 تريلليون تەڭگە بولىنەتىنىن جەتكىزدى. ونىڭ پىكىرىنشە، ۇكىمەت پەن اكىمدىكتەر بۇل قارجىنى ءوڭىر تۇرعىندارىنا بارىنشا ءتيىمدى بولاتىنداي جۇمساۋى كەرەك.