اۋعانستاننىڭ حالقى جالعىز قالماۋى ءتيىس.
قازاقستان پرەزيدەنتى قاسىم-جومارت توقايەۆ اۋعانستانعا كومەك جەتكىزۋ ءۇشىن الماتىدا گۋمانيتارلىق حاب ۇيىمداستىرۋدى ۇسىندى، دەپ حابارلايدى Almaty-akshamy.kz Almaty.tv سىلتەمە جاساپ.
«بۇل كۇندەرى بۇكىل الەمدە جانە دۋشانبەدە اۋعان ماسەلەسى تۋرالى كوپ ايتىلىپ، شىۇ الاڭىندا كەڭەس وتكىزىلىپ جاتىر، ەلدەگى جاعداي كەشە ۇجىمدىق قاۋىپسىزدىك تۋرالى شارت ۇيىمىنىڭ وتىرىسىندا دا تالقىلاندى. قازاقستان بولاشاق اۋعانستاندى كورشىلەرىمەن تاتۋ ءومىر سۇرەتىن شىنايى تاۋەلسىز جانە ءبىرتۇتاس مەملەكەت رەتىندە كورەدى. وسى تاعدىرشەشتى تاريحي ساتتە اۋعانستاننىڭ كوپ ۇلتتى حالقى بۇرىن-سوڭدى بولماعان قيىندىقتارعا قاراماستان، جالعىز قالماۋى ءتيىس»، – دەدى قازاقستان پرەزيدەنتى شانحاي ىنتىماقتاستىق ۇيىمى مەملەكەت باسشىلارى كەڭەسىنىڭ سامميتىندە.
قاسىم-جومارت توقايەۆ شىۇ اۋعانستانداعى بەيبىتشىلىك پەن كەلىسىمگە قول جەتكىزۋدە بەلسەندى ءرول اتقارا الادى جانە اتقارۋى ءتيىس دەپ سانايدى.
«ءبىز تەك ۇجىمدىق كۇش-جىگەرمەن عانا قاۋىپ-قاتەرلەرگە قارسى كۇرەستە وڭىرلىك قاۋىپسىزدىكتى قامتاماسىز ەتە الامىز. قازاقستان ءوز تاراپىنان دەسترۋكتيۆتى يدەولوگيانىڭ، ەسىرتكى اعىنىن جانە اۋعانستاننان تىس جەرلەرگە باقىلاۋسىز كوشى-قوندى بولدىرماۋ ءۇشىن وڭىرلىك ارىپتەستەرىمىزبەن ءوزارا ءىس-قيمىلدى كەڭەيتىپ جاتىر.سونداي-اق، اۋعانستان تاپ بولعان وزەكتى گۋمانيتارلىق جانە ەكونوميكالىق پروبلەمالاردى شەشۋ ءۇشىن قولدان كەلگەنشە كومەك كورسەتۋگە دايىنبىز. قازاقستاننىڭ قولدا بار ينفراقۇرىلىمى مەن لوگيستيكالىق مۇمكىندىكتەرىن ەسكەرە وتىرىپ، اۋعانستانعا حالىقارالىق كومەك جەتكىزۋ ءۇشىن الماتىدا شىۇ گۋمانيتارلىق حابىن ۇيىمداستىرۋدى ۇسىنامىز. بۇل قادام ۇيىمنىڭ وڭىردەگى وتكىر پروبلەمالاردى شەشۋدەگى ءرولىن ارتتىرۋعا، سونداي-اق بۇۇ مەن باسقا دا حالىقارالىق قۇرىلىمداردىڭ قىزمەتىن ۇيلەسىمدى تولىقتىرۋعا مۇمكىندىك بەرەتىنىنە سەنىمدىمىن»، – دەدى توقايەۆ.