سۋ شارۋاشىلىعى نىساندارىنىڭ 60 پايىزىنىڭ توزىعى جەتكەن.
بۇل تۋرالى پارلامەنت پالاتالارىنىڭ بىرلەسكەن وتىرىسىندا قازاقستان حالقىنا جولداۋىن جاريالاعان مەملەكەت باسشىسى قاسىم-جومارت توقايەۆ ايتتى، دەپ حابارلايدى Almaty-akshamy.kz.
«شارۋالار مەن ونەركاسىپ وكىلدەرىنە سۋعا قاتىستى ساپالى ساراپتامالار مەن بولجامدار كەرەك. بۇل تالداۋلار ءار جىلى جانە ورتا مەرزىمدى كەزەڭدە سۋدىڭ مولشەرى قانداي بولاتىنىن دا قامتۋى قاجەت. سوندىقتان ءبارىن الدىن الا جوسپارلاعان ءجون. سونداي-اق ىشكى سۋ رەسۋرستارىن ۇنەمدەپ پايدالانۋ وتە ماڭىزدى. سۋدى ۇنەمدەيتىن تەحنولوگيا وتە باياۋ ەنگىزىلۋدە. سۋدى شاقتاپ پايدالانۋ مادەنيەتى دە جوق. ەلىمىزدىڭ كەيبىر وڭىرلەرىندە سۋدى ەڭ كوپ جۇمسايتىن اۋىل شارۋاشىلىعى سالاسىندا ونىڭ 40 پايىزى بوسقا ىسىراپ بولىپ جاتىر. سۋ شارۋاشىلىعى نىساندارىنىڭ 60 پايىزى توزىپ تۇر»، - دەدى مەملەكەت باسشىسى.
پرەزيدەنتتىڭ پايىمىنشا، ولقىلىقتىڭ ورنىن تولتىرۋ ءۇشىن وتە باتىل جانە شۇعىل شارالار قاجەت. ەڭ الدىمەن، سۋدى ۇنەمدەيتىن وزىق تەحنولوگيانى ەنگىزۋ ءىسىن تەزدەتىپ، ونى قولدانۋ اۋماعىن جىل سايىن 150 مىڭ گەكتارعا دەيىن كەڭەيتۋ كەرەك.
«كوكتەمگى قارعىن سۋدى جيناۋ جانە ونى ەگىستىككە جەتكەنشە قۇمعا ءسىڭىرىپ جوعالتىپ الماۋ ماسەلەسى شەشىمىن تابۋعا ءتيىس. ويتكەنى ونىڭ ءبارى – ىشكى سۋ قورىمىز. ول ءۇشىن 20 جاڭا بوگەن سالۋ، كەمىندە 15 سۋ قويماسىنا كۇردەلى جوندەۋ جۇرگىزۋ جانە 3 500 شاقىرىمدىق كانالدى جاڭعىرتىپ، سيفرلىق تاسىلمەن باقىلاۋعا الۋ كەرەك. نەگىزگى مىندەت – 2027 جىلعا قاراي قوسىمشا ەكى تەكشە شاقىرىم سۋعا قول جەتكىزۋ»، - دەدى قاسىم-جومارت توقايەۆ.