پرەزيدەنت ساۋد ارابياسىنىڭ اۋىل شارۋاشىلىعى ءمينيسترى ابدۋلراحمان ءال-فادليدى قابىلدادى، دەپ حابارلايدى Almaty-akshamy.kz.
پرەزيدەنت ساۋد ارابياسى كورولدىگىنىڭ اۋىل شارۋاشىلىعى، قورشاعان ورتانى قورعاۋ جانە سۋ رەسۋرستارى ءمينيسترى ابدۋلراحمان ال-فادليگە ءىلتيپات بىلدىرە وتىرىپ، ونىڭ ساپارى ەكى ەل اراسىنداعى كوپجاقتى ىنتىماقتاستىقتى ودان ءارى دامىتۋعا تىڭ سەرپىن بەرەتىنىن اتاپ ءوتتى. قاسىم-جومارت توقايەۆ ساۋد ارابياسىنىڭ تاق مۇراگەرىمەن كەلىسسوزدەر بارىسىندا قول جەتكىزىلگەن ۋاعدالاستىقتاردى جۇزەگە اسىرۋ ماڭىزدى ەكەنىنە توقتالدى.
– جيدداعا ساپارىم بارىسىندا تاق مۇراگەرى مۇحاممەد بەن سالمان بەن ابدەلازيز ءال ساۋدپەن كەزدەستىم. كەزدەسۋدە ءبىز ەكى ەل اراسىنداعى تىعىز ىنتىماقتاستىق پەن قارىم-قاتىناستى ودان ءارى نىعايتۋ تۋرالى كەلىسىمگە كەلدىك. ءبىزدىڭ ءوزارا ۋاعدالاستىقتارىمىز ءقازىردىڭ وزىندە جۇزەگە اسىرىلىپ جاتىر جانە دايەكتى تۇردە ورىندالىپ كەلەدى، – دەدى پرەزيدەنت.
ابدۋلراحمان ءال-فادلي قۇرمەت كورسەتىپ، قوناقجايلىق تانىتقانى ءۇشىن مەملەكەت باسشىسىنا العىس ايتتى. سونداي-اق تاق مۇراگەرىنىڭ قازاقستانمەن ءوزارا ءتيىمدى ىنتىماقتاستىقتى كەڭەيتۋگە نيەتتى ەكەنىن راستادى. مينيستر ءوز سوزىندە ازىق-تۇلىك قاۋىپسىزدىگى ماسەلەلەرىنە ەرەكشە نازار اۋداردى.
– وزىڭىزگە ءمالىم، ازىق-تۇلىك قاۋىپسىزدىگى – بۇكىل الەم ءۇشىن وزەكتى ماسەلە. قازاقستان بۇل باعىتتا نەگىزگى ءرول اتقارادى دەپ سانايمىز، – دەدى ابدۋلراحمان ءال-فادلي.
اڭگىمەلەسۋ بارىسىندا ساۋدا-ەكونوميكالىق ىنتىماقتاستىق ماسەلەلەرى جانە اۋىل شارۋاشىلىعى مەن تۋريزم سالالارىنداعى ءوزارا بايلانىس پەرسپەكتيۆالارى تالقىلاندى.