مەملەكەت باسشىسى «قتج» ۇك» اكسيونەرلىك قوعامى مەن قىتايدىڭ Huawei كومپانياسى بىرلەسىپ قۇرعان جاڭا يننوۆاسيالىق ورتالىقتى اشتى، دەپ حابارلايدى اlmaty-akshamy.kz.
«قتج» ۇك» اق باسقارما ءتوراعاسى نۇرلان ساۋرانبايەۆتىڭ ايتۋىنشا، اتالعان ورتالىق «اقىلدى تەمىر جول» جوباسىن جۇزەگە اسىرۋ ماقساتىندا قۇرىلعان. مەملەكەت باسشىسىنا تەمىرجول كولىگى جۇمىسىنىڭ تيىمدىلىگىن ارتتىرۋعا باعىتتالعان سيفرلىق شەشىمدەر تانىستىرىلدى. جوبالار IT جانە تەلەكوممۋنيكاسيا سالالارىنداعى الەمنىڭ جەتەكشى كومپانيالارىن تارتا وتىرىپ ىسكە اسىرىلۋدا.
بۇگىندە قازاقستان تەمىرجولى PSA كومپانياسىمەن بىرلەسىپ، ترانسكاسپيي باعىتىندا تۇتاس سيفرلىق ءدالىز ازىرلەپ، ىسكە قوستى. جۇيە ۋاقىتتى ۇنەمدەيدى جانە تاسىمالداۋ پروسەسىن بارىنشا اشىق، ال قازاقستاندى ساۋدا اعىندارى ءۇشىن تارتىمدى ەتەدى. Wabtec كومپانياسىنىڭ لوكوموتيۆتەرىن ءتيىمدى پايدالانۋ جونىندەگى پيلوتتىق جوباسى جۇزەگە اسىرىلىپ جاتىر.
بۇلتتى شەشىمدەردى، Big Data، ينتەرنەت زاتتار (IoT) جانە جاساندى ينتەللەكتىنى (AI) پايدالانا وتىرىپ، «قازاقستان تەمىرجولىنىڭ» ينفراقۇرىلىمى مەن قىزمەتتەرىن جاڭعىرتۋ جۇمىستارى جۇرگىزىلۋدە.
پرەزيدەنت كولىك-لوگيستيكا جانە يننوۆاسيا ورتالىقتارىن اشۋ ماڭىزدى ەكەنىن اتاپ ءوتتى.
– بۇل – «ءبىر بەلدەۋ، ءبىر جول» جاھاندىق باستاماسى بويىنشا ىسكە قوسىلعان جوبا. قازاقستان ءتوراعا سي سزينپين 2013 جىلى ءبىزدىڭ ەلىمىزدە جاريالاعان ءىرى جوبانى تولىعىمەن قولدايدى. وسى باستامانىڭ ارقاسىندا ورتالىقتىڭ قۇرىلىسى قىسقا مەرزىمدە اياقتالدى. مۇنىڭ بارلىعى – ەكى ەل اراسىنداعى تابىستى سەرىكتەستىك ناتيجەسى. بۇل جوبا ترانسكاسپيي حالىقارالىق كولىك ءدالىزىن دامىتۋعا جاڭا سەرپىن بەرمەك. سونداي-اق ەۋرازياداعى ساۋدا-ەكونوميكا ىنتىماقتاستىعىن نىعايتا تۇسەدى دەپ سانايمىن. وسى ورتالىقتىڭ ساپالى سالىنۋىنا قازاقستاننىڭ جانە قىتايدىڭ كوپتەگەن ماماندارى اتسالىستى. مەن بۇگىن بارشاڭىزعا ريزاشىلىعىمدى بىلدىرەمىن، – دەدى قاسىم-جومارت توقايەۆ.
پرەزيدەنت قازاقستاندى ەۋرازيانىڭ نەگىزگى ترانزيت حابىنا اينالدىرۋ ماقساتىندا قابىلدانىپ جاتقان كەشەندى شارالاردى وڭ باعالادى.
بۇل رەتتە مەملەكەت باسشىسى شىن مانىندە باسەكەگە قابىلەتتى بولۋ ءۇشىن زامان تالابىنا ساي يننوۆاسيالىق شەشىمدەر قابىلداعان ءجون دەپ سانايدى.
– جۋىردا وتكەن ۇكىمەتتىڭ كەڭەيتىلگەن وتىرىسىندا ەكونوميكانىڭ بارلىق سالاسىن سيفرلاندىرۋ ماسەلەسىنە ايرىقشا ءمان بەردىم. قازاقستاندا وزىق IT-شەشىمدەردى ەنگىزۋ ءۇشىن بەرىك نەگىز قالىپتاسقان. وتاندىق تەمىرجول سالاسى «سيفرلىق جارىسقا» ۋاقىت وزدىرماي قوسىلۋعا ءتيىس. بۇعان بەلگىلى ءبىر دەڭگەيدە ازىرلىك بار ەكەنىن كورىپ وتىرمىز. سيفرلاندىرۋدى جەدەلدەتۋ ەسەبىنەن تاياۋ ارادا تاسىمال تيىمدىلىگىن ارتتىرۋ جانە شىعىنداردى قىسقارتۋ مىندەتى تۇر. بۇل تەك كولىك-لوگيستيكا سالاسىنىڭ عانا ەمەس، جالپى ەكونوميكانىڭ دامۋىنا تىڭ سەرپىن بەرەدى. IT-شەشىمدەر رەتسىز ەنگىزىلمەي، ءبىر-بىرىن تولىقتىرىپ، ءبىرتۇتاس ەكوجۇيە قالىپتاستىرۋى كەرەك. بۇل – ماڭىزدى، – دەدى قاسىم-جومارت توقايەۆ.
مەملەكەت باسشىسى اتالعان مىندەتتى جۇزەگە اسىرۋعا وتاندىق كومپانيالاردى تارتۋ قاجەت ەكەنىن ايتتى.
– بۇل جۇمىسقا وتاندىق IT-كومپانيالاردى تارتۋ تۋرالى ۇسىنىستى تولىق قولدايمىن. ەلىمىزدە مۇنداي كومپانيالار مەن ماماندار جەتكىلىكتى. الەمدىك IT-كومپانيالارمەن دە ءتيىمدى بايلانىس ورناتۋ قاجەت. وسىنداي ستراتەگيا ەكونوميكانىڭ بارلىق سالاسىندا ىسكە اسىرىلۋعا ءتيىس، – دەدى پرەزيدەنت.
قاسىم-جومارت توقايەۆ بىرلەسكەن جوبالارعا اتسالىسىپ جاتقان شەتەلدىك كومپانيالارعا العىس ءبىلدىردى.
يننوۆاسيالىق ورتالىقتا Huawei Technologies Kazakhstan كومپانياسىنىڭ باس ديرەكتورى چجاو سيۋي، Lianyungang Port Group كومپانياسى ديرەكتورلار كەڭەسىنىڭ ءتوراعاسى يان لونگ، Global DTS كومپانياسىنىڭ باس ديرەكتورى ۋي تان يونگ، Wabtec كورپوراسياسىنىڭ تمد، ەۋروپا، تاياۋ شىعىس جانە افريكا بويىنشا اعا ۆيسە-پرەزيدەنتى بايحان گوحان، «Alan TECH» ءجشس-نىڭ ديرەكتورى باۋىرجان ايتىلەۋ ءسوز سويلەدى.