مەملەكەت باسشىسى «قازمۇنايگاز» ۇك» اق باسقارما ءتوراعاسى ماعزۇم مىرزاعالييەۆتى قابىلدادى، دەپ حابارلايدى Almaty-akshamy.kz اقورداعا سىلتەمە جاساپ.
قاسىم-جومارت توقايەۆقا ۇلتتىق كومپانيا قىزمەتىنىڭ ناتيجەسى جونىندە مالىمەت بەرىلدى.
بيىلعى 8 ايدا مۇناي جانە گاز كوندەنساتىن ءوندىرۋ، مۇناي تاسىمالداۋ جانە قايتا وڭدەۋ كورسەتكىشتەرى بويىنشا ءوسىم بار ەكەنى اتاپ ءوتىلدى.
ماعزۇم مىرزاعالييەۆتىڭ ايتۋىنشا، «قازمۇنايگاز» ۇك» اق مۇنايدىڭ وتاندىق برەندى KEBCO (Kazakhstan Export Blend Crude Oil) ءوندىرىسىن باستادى.
قازىرگى تاڭدا KEBCO مۇنايىنىڭ ەكسپورت كولەمى تۇراقتى تۇردە ارتىپ كەلەدى.
بۇل رەتتە KEBCO مۇنايىنىڭ باعاسى بيىلعى تامىز ايىندا Brent مۇناي ماركاسىنىڭ باعاسىنان اسىپ ءتۇستى.
سونداي-اق پرەزيدەنتكە مۇناي وڭدەۋ زاۋىتتارىنان جانار-جاعارماي جونەلتۋ قارقىنى، سونىڭ ىشىندە كۇزگى جيىن-تەرىن ماۋسىمىندا اۋىل شارۋاشىلىعى تاۋارىن وندىرۋشىلەردىڭ قاجەتتىلىگىن قامتاماسىز ەتۋ ءىسى جونىندە باياندالدى.
اتاپ ايتقاندا، «قازمۇنايگاز» كومپانياسى ەگىن جيناۋ ناۋقانىنا 426 مىڭ توننا ديزەل وتىنىن بولگەن.
سونىمەن قاتار مەملەكەت باسشىسىنا كومپانيانىڭ تانكەر فلوتىن كەڭەيتۋ، سونىڭ ىشىندە كاسپيي تەڭىزى مەن باسقا دا اشىق تەڭىز اكۆاتوريالارىندا ەنەرگەتيكالىق رەسۋرستاردى تاسىمالداۋعا ارنالعان ءىرى تونناجدى تانكەرلەر سانىن كوبەيتۋ جۇمىستارى تۋرالى مالىمەت بەرىلدى.
قاسىم-جومارت توقايەۆقا ۇلتتىق كومپانيانىڭ وڭىرلەردە جۇزەگە اسىرىپ جاتقان الەۋمەتتىك جوبالارى جونىندە ەسەپ بەرىلدى.
اتاپ ايتقاندا، پرەزيدەنتكە ماڭعىستاۋ وبلىسىنىڭ جاڭاوزەن قالاسىن اۋىزسۋمەن قامتاماسىز ەتۋ ءۇشىن جاڭا سۋ تۇشىتۋ زاۋىتىنىڭ قۇرىلىسى باستالعانى جانە استراحان – ماڭعىشلاق ماگيسترالدى سۋ قۇبىرىن رەكونسترۋكسيالاۋ جۇمىستارىنىڭ بارىسى جونىندە باياندالدى.
كەزدەسۋ سوڭىندا مەملەكەت باسشىسى ينۆەستيسيالىق جوبالاردى جۇزەگە اسىرۋ، كومىرسۋتەگى ەكسپورتىن ارتتىرۋ جانە گەولوگيالىق بارلاۋ جۇمىستارىنىڭ اۋقىمىن كەڭەيتۋ جونىندە ءبىرقاتار ناقتى تاپسىرما بەردى.
سونداي-اق پرەزيدەنت مۇناي مەن گازدى تەرەڭ وڭدەۋ سالاسىنا باسا ءمان بەرۋ ماڭىزدى ەكەنىن اتاپ ءوتتى.