مەملەكەت باسشىسى قاسىم-جومارت توقايەۆ قازاقستاننىڭ اسكەري دوكتريناسىن بەكىتتى، دەپ حابارلايدى Almaty-akshamy.kz Inform.kz-كە سىلتەمە جاساپ.
قۇجاتتى قورعانىس مينيسترلىگى باسقا كۇشتىك قۇرىلىمدارمەن جانە مۇددەلى مەملەكەتتىك ورگاندارمەن بىرلەسىپ ازىرلەگەن.
مەملەكەت باسشىسى 2021 جىلعى «حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى» اتتى جولداۋىندا اسكەري دوكترينانى قايتا قاراۋ قاجەتتىگىن مالىمدەگەن ەدى. قارۋلى كۇشتەردى، باسقا دا اسكەرلەر مەن اسكەري قۇرالىمداردى قايتا فورماتتاۋ تۋرالى ءبىرقاتار تاپسىرمالار بەرگەن پرەزيدەنت قورعانىس قابىلەتىن نىعايتۋ، قاۋىپ-قاتەرلەرگە دەن قويۋدىڭ جەدەلدىگىن ارتتىرۋ مەملەكەتتىك ماڭىزى بار باسىمدىقتارعا اينالۋعا ءتيىس ەكەنىن اتاپ ءوتتى.
قۇجاتتا اسكەري قاۋىپتەر مەن قاۋىپسىزدىككە اسەر ەتەتىن زاماناۋي جاعدايلار مەن فاكتورلار كورسەتىلگەن. وعان اسكەري-ساياسي جانە اسكەري-ستراتەگيالىق سالالارداعى قىزمەتتىڭ جاڭا باعىتتارى، نورماتيۆتىك قۇقىقتىق اكتىلەردى جۇيەلەۋ جانە اسكەري جوسپارلاۋ جۇيەسىن ەنگىزۋ شارالارى ەنگىزىلگەن.
قارۋلى كۇشتەردىڭ جاۋىنگەرلىك الەۋەتىن ارتتىرۋ ماقساتىندا ارنايى وپەراسيالار كۇشتەرىن دامىتۋ جانە ولاردىڭ باسقا مەملەكەتتىك ورگانداردىڭ ارنايى ماقساتتاعى بولىمشەلەرىمەن ءوزارا ءىس-قيمىلىن كەڭەيتۋ كوزدەلگەن.
اسكەري دوكترينانىڭ جاڭا رەداكسياسى مەملەكەتتىڭ اسكەري قاۋىپسىزدىگى مەن قورعانىسىن قامتاماسىز ەتۋ جونىندەگى كوزقاراسىن قازىرگى زامانعى تالاپتار مەن جاعدايلارعا بەيىمدەۋگە مۇمكىندىك بەرەدى، سونداي-اق جاڭا قاتەرلەر مەن تاۋەكەلدەرگە دەن قويۋداعى ەلدىڭ اسكەري الەۋەتىن ارتتىرادى.
اسكەري دوكتريناعا وزگەرىستەر ەنگىزۋ تۋرالى جارلىق زاڭدى كۇشىنە ەندى.