مەملەكەت باسشىسى قاسىم-جومارت توقايەۆ قازاقستاندىقتاردى جاڭا جىلمەن قۇتتىقتادى.
اlmaty-akshamy.kz اقورداعا سىلتەمە جاساپ، پرەزيدەنت ءسوزىنىڭ تولىق ءماتىنىن جاريالايدى.
قۇرمەتتى وتانداستار!
مىنە، ءبىز ءقازىر ءبىر ەل بولىپ، جاڭا جىلدى قارسى الامىز. ونى ءبارىمىز ىزگى نيەتپەن كۇتىپ وتىرمىز. وسى ساتتە مەرەكەلىك كوڭىل-كۇيمەن بىر-بىرىمىزگە اق تىلەك ايتامىز. بولاشاققا سەنىممەن قاراپ، جوسپار قۇرامىز. ميلليونداعان ازاماتتارىمىز سياقتى مەن جاڭا جىل جارىلقاسىن دەپ كەلەشەككە ۇمىتپەن قارايمىن. ءوتىپ بارا جاتقان جىل ەلىمىز ءۇشىن وڭاي بولعان جوق، كۇردەلى بولدى. قاڭتار ايىندا تاۋەلسىزدىك تاريحىنداعى زور سىن-قاتەرگە تاپ بولدىق. ءبىراق حالقىمىزدىڭ مىزعىماس بىرلىگىنىڭ ارقاسىندا ءبىز وسى قاتەردىڭ بەتىن قايتاردىق. ەلدىگىمىزدى ساقتاپ قالدىق. ءتول تاريحىمىزعا قاراساق، جۇرتىمىز كوپتەگەن سىنداردان شىڭدالىپ شىققان. ءبىز دە قيىندىقتاردى ارتقا تاستاپ، العا قاراي نىق قادام باستىق.
جالپى، وسى جىل قازاقستان ءۇشىن تۇبەگەيلى بەتبۇرىس جىلىنا اينالدى. ءبىز مەملەكەتتىگىمىزدى نىعايتىپ، جاڭارۋ جانە جاڭعىرۋ جولىنا تۇستىك. جالپىحالىقتىق رەفەرەندۋم وتكىزىپ، شىن مانىندە جاڭا كونستيتۋسيامىزدى قابىلدادىق. وندا ناعىز ادىلدىك رۋحى كورىنىس تاپتى. ەندى پرەزيدەنت 7 جىلدىق مەرزىمگە ءبىر رەت قانا سايلاناتىن بولدى. پارلامەنت جۇيەسىنىڭ رەفورماسىن باستادىق. حالقىمىز اۋقىمدى وزگەرىستەرگە قولداۋ ءبىلدىردى. سايلاۋ جۇيەسىنە جاڭا ەرەجەلەر ەنگىزىلدى. پرەزيدەنت سايلاۋى اشىق جانە ءادىل ءوتتى. مۇنىڭ ءبارى ەلىمىزدىڭ ساياسي جۇيەسىن جان-جاقتى جاڭعىرتا ءتۇستى. اكىمشىلىك-اۋماقتىق رەفورما جاسادىق. اباي، ۇلىتاۋ جانە جەتىسۋ وبلىستارى قۇرىلدى. ۇلتتىق قۇرىلتايدىڭ العاشقى وتىرىسى ءوتتى. ەڭ وزەكتى ماسەلەلەردى اۋقىمدى ديالوگ ارقىلى شەشەتىن بولدىق. «رەسپۋبليكا كۇنىنە» ۇلتتىق مەرەكە مارتەبەسى بەرىلدى.
بيىل ەلىمىز ءۇشىن نەسىبەلى جىل بولدى. 400 مىڭعا جۋىق ءسابي دۇنيەگە كەلىپ، كوپتەگەن وتباسىنىڭ شاڭىراعى باقىتقا تولدى. ءبىز بالالار جىلىندا «ۇلتتىق قور – بالالارعا» باستاماسىن كوتەردىك. بۇل – وسكەلەڭ ۇرپاقتىڭ جارقىن بولاشاعى ءۇشىن جاسالعان وتە ماڭىزدى قادام. ديقاندارىمىز 23 ميلليون توننا استىق جينادى. بوس جاتقان 5 ميلليون گەكتار جەر مەملەكەتكە قايتارىلدى. بىرنەشە ءىرى ءوندىرىس ىسكە قوسىلدى. مىڭداعان جاڭا جۇمىس ورىندارى اشىلدى. «قازاقستان حالقىنا» قورى قۇرىلدى، سونىڭ ارقاسىندا كوپتەگەن ازاماتقا ناقتى كومەك كورسەتىلىپ جاتىر. سپورتشىلارىمىز الەمدىك جارىستاردا كوك تۋىمىزدى جەلبىرەتتى. كۇردەلى گەوساياسي جاعدايدا قازاقستاننىڭ حالىقارالىق بەدەلىن ارتتىردىق، ءبىرقاتار الپاۋىت ەلدەردىڭ سەنىمدى سەرىكتەسى اتاندىق. وسىلايشا، بارىس جىلى اۋقىمدى وزگەرىستەر مەن جاڭا ءداۋىردىڭ باستاۋى بولدى.