پرەزيدەنت قاسىم-جومارت توقايەۆ قاراعاندى وبلىسىندا "ارسەلورميتتال تەمىرتاۋ" اكسيونەرلىك قوعامىنا قاراستى كوستەنكو اتىنداعى شاحتادا بولعان ءورت سالدارىنان قازا تاپقان كەنشىلەردىڭ وتباسى مەن تۋعان-تۋىستارىنا كوڭىل ايتتى
بۇل اقپارات اقوردانىڭ Telegram-داعى ارناسىندا جاريالاندى.
"مەن مەملەكەت باسشىسى رەتىندە بارشاڭىزعا كوڭىل ايتامىن. بۇل – قاسىرەت. ءبارىن تۇسىنەمىن. اپات بولدى. اپاتتىڭ كەسىرىنەن كوپتەگەن ادام قازا تاپتى. سوندىقتان بۇل جەرگە ارنايى كەلدىم. ءتيىستى شارالار قابىلدايمىز، سونىڭ ىشىندە زارداپ شەككەندەردىڭ وتباسىنا كومەك كورسەتەمىز. قازا تاپقاندار مەن زارداپ شەككەندەردىڭ وتباسىلارى ەشقانداي مۇقتاجدىق كورمەۋى ءۇشىن ۇكىمەت، اكىمدىك جانە قايىرىمدىلىق ۇيىمدارىنىڭ الدىندا جان-جاقتى كومەك كورسەتۋ مىندەتى تۇر"، – دەدى پرەزيدەنت.
مەملەكەت باسشىسىنىڭ ايتۋىنشا، جەر استىندا قالعان كەنشىلەردى قۇتقارۋ، زارداپ شەككەن جانە قازا بولعان ازاماتتاردىڭ وتباسىلارىنا جان-جاقتى كومەك كورسەتۋ – كەزەك كۇتتىرمەيتىن مىندەت
"ەڭ الدىمەن، قۇتقارۋ جۇمىستارى جۇرگىزىلەدى. ەكىنشىدەن، زارداپ شەككەندەر مەن مەديسينالىق كومەككە مۇقتاج ازاماتتاردىڭ ناقتى سانىن انىقتاۋىمىز كەرەك. ۇشىنشىدەن، وسى اپاتتان زارداپ شەككەندەردىڭ بارلىعىنىڭ وتباسىنا ماتەريالدىق كومەك كورسەتەمىز. ەگەر قاجەت بولسا، ارنايى قور اشامىز. مۇنىمەن ءوزىم اينالىسامىن"، – دەدى پرەزيدەنت.