ەل تاريحىنداعى 13ء-شى قارالى كۇن جاريالاندى.
30 -دان ءسال عانا اسقان عۇمىرى بار ەل ءۇشىن تىم كوپ...
بۇگىن قاراعاندى وبلىسىنداعى كوستەنكو اتىنداعى شاحتادا بولعان اپاتقا بايلانىستى مەملەكەت باسشىسى ەرتەڭگى كۇندى جالپىۇلتتىق ازا تۇتۋ كۇنى دەپ جاريالايتىنىن ايتتى.
تاۋەلسىز قازاقستان تاريحىندا ەڭ العاشقى ازا تۇتۋ كۇنى 2006 جىلى جاريالاندى. سودان بەرى ەلىمىزدە بىرنەشە رەت قارالى كۇن قايتالاندى. ۇشاق اپاتى، شاحتاداعى اپات، تەرروريستىك اكتىلەر، اسكەري قويماداعى جارىلىس، كوروناۆيرۋس پاندەمياسى سالدارىنان مىڭداعان ادام مەرت بولدى. ولار –قىزمەت بارىسىندا قايتىس بولعاندار مەن بەيبىت تۇرعىندار.
شاحتاداعى جارىلىس
2006 جىلعى 20 قىركۇيەكتە تاۋەلسىز قازاقستان تاريحىندا ەڭ العاشقى قارالى كۇن (ازا تۇتۋ) جاريالاندى. قاراعاندى وبلىسىنىڭ اۋماعىندا ورنالاسقان لەنين اتىنداعى شاحتادا جانتۇرشىگەرلىك جارىلىس بولدى. اپات سالدارىنان 41 شاحتەر قازا تاپتى. جەتى جۇمىسشى جارالاندى.
«اباي» شاحتاسىنداعى جارىلىس
تاۋەلسىز قازاقستان تاريحىنداعى ازا تۇتۋ كۇنى ەكىنشى رەت 2008 جىلدىڭ 11 قاڭتارىندا جاريالاندى. قاراعاندى وبلىسىنىڭ اباي قالاسىنىڭ جانىنداعى شاحتادا بولعان جارىلىس 30 كەنشىنىڭ ءومىرىن قيدى. تاعى 14 جۇمىسشى اۋىر جاراقات الدى.
قىزىلاعاش تراگەدياسى
2010 جىلعى 11 ناۋرىزدا الماتى وبلىسىنداعى (قازىرگى جەتىسۋ وبلىسى) قىزىلاعاش سۋ قويماسى بۇزىلىپ، ارىنى قاتتى تاسقىن سۋ تۇتاس اۋىلدى شايىپ كەتتى. رەسمي دەرەككە سايكەس، سۋ تاسقىنى سالدارىنان 45 ادام وپات قىلدى. 300-دەي تۇرعىن ءتۇرلى جاراقات الدى. بۇل – تاۋەلسىز قازاقستان تاريحىنداعى ەڭ الاپات سۋ تاسقىنى. قايعىلى وقيعاعا بايلانىستى 2010 جىلدىڭ 16 ناۋرىزىندا جالپىۇلتتىق ازا تۇتۋ كۇنى جاريالاندى.
«ارقانكەرگەندەگى» قايعىلى وقيعا
2012 جىلدىڭ 28 مامىرىندا قازاق-قىتاي شەكاراسىندا ورنالاسقان «ارقانكەرگەن» شەكارا بەكەتىندە قايعىلى وقيعا بولدى. مامىردىڭ اياعىندا «ارقانكەرگەندەگى» شەكاراشىلارمەن بايلانىس كەنەت ۇزىلگەن. سودان كەيىن ول جەرگە جاساق جىبەرىلگەن. 30 مامىردا «ارقانكەرگەنگە» جىبەرىلگەن جاساق شەكارا بەكەتىنىڭ جانىپ كەتكەنىن حابارلادى.
ءبىر كۇننەن كەيىن ۇلتتىق قاۋىپسىزدىك كوميتەتىنە قاراستى شەكارا قىزمەتى ورتەنىپ كەتكەن عيماراتتان 12 ادامنىڭ سۇيەگى، ال كەلەسى كۇنى تاعى ەكى شەكاراشىنىڭ مۇردەسى تابىلعانىن مالىمدەدى. سونداي-اق ءبىر قورىقشىنىڭ ءمايىتى تابىلعان.
پرەزيدەنت شەكارا شەبىندەگى قايعىلى جاعدايعا بايلانىستى 2012 جىلعى 5 ماۋسىمدى ۇلتتىق ازا تۇتۋ كۇنى دەپ بەلگىلەدى.
شەكاراشىلار مىنگەن ۇشاق اپاتى
2012 جىلدىڭ 25 جەلتوقسانىندا شىمكەنت تۇبىندە شەكاراشىلار مىنگەن ان-72 ۇشاعى قۇلادى. ۇشاق بورتىندا بولعان 27 ادام تۇگەل كوز جۇمدى. ولاردىڭ اراسىندا ۇقك شەكارا قىزمەتىنىڭ باسشىسى تۇرعانبەك ستامبەكوۆ تە بولدى. قايعىلى وقيعادان كەيىن، 27 جەلتوقسان قازاقستاندا جالپىۇلتتىق ازا تۇتۋ كۇنى دەپ جاريالاندى.
21 ادامنىڭ ءومىرىن قيعان ۇشاق اپاتى
2013 جىلى كوكشەتاۋدان الماتىعا ۇشىپ شىققان Chellenger-200 (SCAT اۆياكومپانياسىنا تيەسىلى) ۇشاعى اۋەجايعا جەتە الماي، اپاتقا ۇشىرادى. اپات ناتيجەسىندە 21 ادام قازا تاپتى.
وسى قايعىلى وقيعاعا بايلانىستى 2013 جىلدىڭ 31 قاڭتارى جالپىۇلتتىق ازا تۇتۋ كۇنى دەپ جاريالاندى.
اقتوبەدەگى تەراكت
2016 جىلدىڭ 5 ماۋسىمىندا قارۋلى توپ اقتوبەدەگى ەكى بىردەي قارۋ-جاراق دۇكەنىنە جانە اسكەري بولىمگە شابۋىلدار جاسادى. تەررورشىلاردىڭ قولىنان 8 ادام مەرت بولدى، ونىڭ ۇشەۋى – اسكەري قىزمەتشى.
انتيتەرروريستىك وپەراسيا بارىسىندا ارنايى جاساق جاۋىنگەرلەرى قارۋلانعان 18 قىلمىسكەردىڭ كوزىن جويدى.
اقتوبەدەگى تەراكت كەزىندە اسكەريلەر مەن بەيبىت تۇرعىنداردىڭ قازا بولۋىنا بايلانىستى 2016 جىلدىڭ 9 ماۋسىمى ۇلتتىق ازا تۇتۋ كۇنى دەپ بەلگىلەندى.
«باقيلىق» بولعان BEK AIR
2019 جىلدىڭ 27 جەلتوقسانىندا الماتى قالاسىنىڭ اۋەجايى اۋماعىندا Bek Air اۋە كومپانياسىنا تيەسىلى Fokker 100 اۋە كەمەسى اپاتقا ۇشىرادى. اپات كەزىندە ۇشاق بورتىندا 93 جولاۋشى مەن 5 ەكيپاج مۇشەسى بولعان. اپات سالدارىنان 15 ادام كوز جۇمىپ، 50 شاقتىسى ءتۇرلى جاراقات الدى.
وسىعان بايلانىستى 2019 جىلدىڭ 28 جەلتوقسانى قازاقستاندا جالپىۇلتتىق ازا تۇتۋ كۇنى دەپ جاريالاندى.
الەمدى جايلاعان ىندەت
2020 جىلى تاراعان كوروناۆيرۋس ينفەكسياسى الەم بويىنشا ميلليونداعان ادامنىڭ ءومىرىن جالمادى. قازاقستان حالقى – ورتالىق ازياداعى پاندەميا سالدارىنان ەڭ كوپ زارداپ شەككەن ەل. سوڭعى دەرەكتەرگە سۇيەنسەك، قازاقستاندا كوروناۆيرۋستان 14 مىڭعا جۋىق ادام قايتىس بولعان.
2020 جىلدىڭ العاشقى جارتىسىندا قازاقستاندا كوروناۆيرۋس ىندەتى ءورشىپ، مىڭداعان ادام قايتىس بولدى. وسىعان بايلانىستى 2020 جىلدىڭ 13 شىلدەسى «قازاقستان رەسپۋبليكاسىندا كوروناۆيرۋس ىندەتىنەن قايتىس بولعان ازاماتتاردى ەسكە الۋ ءۇشىن جالپىۇلتتىق ازا تۇتۋ كۇنى» بولىپ جاريالاندى.
بيىل 5 مامىردا دۇنيەجۇزىلىك دەنساۋلىق ساقتاۋ ۇيىمى (ددۇ) رەسمي تۇردە الەمدە كوروناۆيرۋس پاندەمياسى اياقتالعانىن مالىمدەدى. قازاقستاندا دا كوروناۆيرۋسقا قارسى شەكتەۋلەر تولىق الىندى.
بايزاقتاعى جارىلىس
2021 جىلدىڭ 26 تامىزدا جامبىل وبلىسى بايزاق اۋدانىندا ورنالاسقان اسكەري ءبولىمنىڭ قويماسىنان ءورت شىقتى. باستاپقىدا اسكەري ءبولىمنىڭ ءورت سوندىرۋشىلەرى ءتىلسىز جاۋمەن وزدەرى كۇرەسىپ كورگەن. ارتىنان توتەنشە جاعدايلار قىزمەتىنىڭ ءورت سوندىرۋشىلەرى كەلدى. ال ءبىر ساعاتتان كەيىن وق-دارىلەر جارىلا باستادى. جاقىن ماڭداعى اۋىل تۇرعىندارى تارازعا كوشىرۋگە شەشىم قابىلداندى.
جارىلىس 2021 جىلدىڭ 26 تامىزىندا بايزاق اۋدانى قاينار اۋىلىنان 420 مەتر جەردە بولدى. سالدارىنان قاينار، ءۇشبۇلاق، جىبەك جولى اۋىلدارىندا 35 اۋلا جانە 12 كاسىپكەرلىك نىسان ءبۇلىندى. جامبىل اكىمدىگىنىڭ حابارلاۋىنشا، قيراعان نىسانداردى قالپىنا كەلتىرۋگە 430 ميلليون تەڭگەدەن استام قارجى ءبولىندى.
اپات سالدارىنان 18 ادام اجال قۇشىپ، 100-گە جۋىق ادام جاراقات الدى. قايتىس بولعانداردىڭ ىشىندە باۋىرجان داۋىتبايەۆتىڭ سۇيەگى ءبىر جىلدان كەيىن تابىلدى.
2021 جىلدىڭ 29 قازانىندا بايزاقتاعى جارىلىس قۇرباندارىنا بايلانىستى جالپىۇلتتىق ازا تۇتۋ كۇنى جاريالاندى.
قاڭتار وقيعاسى
2022 جىل تاۋەلسىز قازاقستان ءۇشىن قايعىلى باستالدى.
2022 جىلعى 10 قاڭتاردا قازاقستاندا جاسالعان تەرروريستىك اكتىلەردىڭ سالدارىنان ادامداردىڭ قازا بولۋىنا بايلانىستى جالپىۇلتتىق ازا تۇتۋ جاريالاندى.
ورمانداعى ءورت
اباي وبلىسىنداعى ورمان ءورتى سالدارىنان قازا تاپقاندارعا بايلانىستى 2023 جىلدىڭ 12 ماۋسىمى قازاقستاندا جالپىۇلتتىق ازا تۇتۋ جاريالاندى.
ورمانداعى ءورتتى سوندىرۋگە قاتىسقان 14 ادام مەرت بولدى. ولاردىڭ ءبارى ورمان شارۋاشىلىعىنىڭ قىزمەتكەرلەرى.
ر.S ەلىمىزدىڭ تۋى ەندى تومەن تۇسپەسىن، باسقالار ءۇشىن جايسىز سانالاتىن 13 قازاقستانداعى ازا تۇتۋ كۇنىنىڭ سوڭعىسى بولسىن دەپ تىلەيىك!