جۇڭگو ەلىنىڭ باسشىسى قازاقستان پرەزيدەنتىن بەيجىڭدەگى حالىق جينالىسى ۇيىندە قارسى الدى.
مارتەبەلى مەيماننىڭ كەلۋىنە وراي قۇرمەت قاراۋىلى ساپ تۇزەپ تۇردى. سودان كەيىن مەملەكەتتەر باسشىلارى ءوز دەلەگاسيالارىمەن بىرگە ۇلكەن شىعىس زالىندا كەلىسسوز جۇرگىزدى، دەپ حابارلايدى اlmaty-akshamy.kz.
قاسىم-جومارت توقايەۆ سي ءسزينپيننىڭ «ءبىر بەلدەۋ، ءبىر جول» حالىقارالىق ىنتىماقتاستىعىنىڭ III فورۋمىنا قاتىسۋعا شاقىرۋىن زور ىقىلاسپەن قابىل الىپ، قىتايعا تاعى دا ساپارمەن كەلگەنىن اتاپ ءوتتى.
─ قازاقستان ءسىزدىڭ وسى جاھاندىق باستاماڭىزعا العاشقى كۇننەن باستاپ قولداۋ ءبىلدىردى جانە ونى ىلگەرىلەتۋگە بەلسەندى اتسالىسىپ كەلەدى. وسىدان تۋرا 10 جىل بۇرىن استانادا سويلەگەن سوزىڭىزدە ءسىزدىڭ وسى باستاما تۋرالى ايتقانىڭىز ەسىمىزدە. ورايلى ءساتتى پايدالانا وتىرىپ، ءسىزدى وسى مەگاجوبانى جۇزەگە اسىرۋ بارىسىندا كەرەمەت ناتيجەگە قول جەتكىزۋىڭىزبەن قۇتتىقتايمىن جانە ايتۋلى شارانىڭ تابىستى وتۋىنە تىلەكتەستىك بىلدىرەمىن. سونداي-اق ءسىزدى جۇڭگو حالىق رەسپۋبليكاسىنىڭ قۇرىلعانىنا 74 جىل تولۋىمەن جانە حانچجوۋدا وتكەن XIX جازعى ازيا ويىندارىنداعى جۇڭگو كومانداسىنىڭ زور جەتىستىگىمەن قۇتتىقتايمىن. ءبىز قىتايدىڭ قارقىندى دامۋىن ەرەكشە ىقىلاسپەن باقىلاپ وتىرمىز. ءسىزدىڭ دانا باسشىلىعىڭىزبەن جۇڭگو الەمدىك جەتەكشى دەرجاۆاعا اينالۋدى كوزدەگەن اسقاق مۇراتىنا جەتۋگە باتىل قادام جاساپ كەلەدى، – دەدى پرەزيدەنت.
قحر ءتوراعاسى شاقىرۋىن قابىل العانى ءۇشىن مەملەكەت باسشىسىنا العىس ايتىپ، ءوزارا ءتيىمدى ىنتىماقتاستىقتى نىعايتۋ ماڭىزدى ەكەنىن اتاپ ءوتتى
– جوعارى دەڭگەيدەگى «ءبىر بەلدەۋ، ءبىر جول» حالىقارالىق ىنتىماقتاستىعىنىڭ III فورۋمىنا قوش كەلدىڭىز. ورنىقتى ءارى قارقىندى قازاق-قىتاي قاتىناستارى ەكى ەل اراسىنداعى ءوزارا سەنىمدى نىعايتىپ، بەيبىتشىلىك پەن تۇراقتىلىقتى قولداۋ ىسىندە باتىل ارەكەت ەتۋگە سەپتىگىن تيگىزەدى. حالىقارالىق جاعدايدىڭ قالاي قۇبىلاتىنىنا قاراماستان، جۇڭگو مەن قازاقستان وزدەرىنىڭ باستاپقى ۇستانىمدارىنان اينىماي، بىر-بىرىنە جاردەمدەسەدى. ەلدەرىمىز اراسىندا دوستىق قاتىناستار ورناعان جىلدار ىشىندە ءبىز ماڭگىلىك ءارى جان-جاقتى ستراتەگيالىق سەرىكتەستىك قالىپتاستىرا الدىق. «ءبىر بەلدەۋ، ءبىر جول» جوباسىن 10 جىل بۇرىن قازاقستاندا كوتەرگەن ەدىم، – دەدى سي سزينپين.
قحر ءتوراعاسىنىڭ ايتۋىنشا، جۇڭگو قازاقستاننىڭ ەگەمەندىگى مەن اۋماقتىق تۇتاستىعىن، سونداي-اق قاسىم-جومارت توقايەۆتىڭ باستاماسىمەن جۇزەگە اسىرىلىپ جاتقان اۋقىمدى رەفورمالاردى تولىقتاي قولدايدى.
كەلىسسوز بارىسىندا تاراپتار ساۋدا-ەكونوميكا، مۇناي-گاز، مۇناي حيمياسى، ەنەرگەتيكا، قارجى، كولىك-ترانزيت، اتوم ونەركاسىبى، ماشينا جاساۋ، تۋريزم، ەلەكتروندى كوممەرسيا جانە جوعارى تەحنولوگيا سالالارىنداعى جان-جاقتى ىقپالداستىقتى دامىتۋ ماسەلەلەرىن تالقىلادى. مەملەكەتتەر باسشىلارى بىرلەسكەن ينۆەستيسيالىق جوبالاردى جۇزەگە اسىرۋ، سونداي-اق مادەنيەتارالىق بايلانىستارعا جاعداي جاساۋ ماڭىزدى ەكەنىنە نازار اۋداردى. بۇدان بولەك، مەملەكەتتەر باسشىلارى حالىقارالىق جانە وڭىرلىك كۇن تارتىبىندەگى وزەكتى ماسەلەلەر جونىندە پىكىر الماستى.
