مەملەكەت باسشىسى كليماتتىڭ وزگەرۋى جونىندەگى بۇۇ-نىڭ نەگىزدەمەلىك كونۆەنسياسى تاراپتارىنىڭ 28ء-شى كونفەرەنسياسى اياسىندا بىرىككەن اراب امىرلىكتەرىنىڭ ينۆەستيسيالار ءمينيسترى، ADQ حولدينگىنىڭ باسقارۋشى ديرەكتورى مۇحاممەد ال-سۋۆەيديمەن كەزدەستى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.
قاسىم-جومارت توقايەۆ پەن مۇحاممەد ال-سۋۆەيدي ەكى ەل اراسىنداعى ينۆەستيسيالىق ىنتىماقتاستىقتىڭ قارقىندى دامۋىنا كوڭىلدەرى تولاتىنىن ايتىپ، بىرلەسكەن ينۆەستيسيالىق جوبالاردى جۇزەگە اسىرۋعا ەرەكشە نازار اۋداردى.
مەملەكەت باسشىسى كونفەرەنسيا اياسىندا قازاقستان مەن ADQ جانە ونىڭ ەنشىلەس كومپانيالارى اراسىندا قول قويىلعان كەلىسىمدەردى جوعارى باعالادى. سونداي-اق ەكىجاقتى بايلانىستاردىڭ قازىرگى ديناميكاسىن ساقتاۋعا دايىن ەكەنىن مالىمدەدى.
كەزدەسۋ بارىسىندا قازاقستان رەسپۋبليكاسىنىڭ اۋماعىندا جالپى قۋاتى 10 گۆت بولاتىن تومەن كومىرتەكتى ەنەرگەتيكانى دامىتۋ جونىندەگى مەموراندۋمعا جانە قۋاتى 1 گۆت بولاتىن جەل ەلەكتر ستانسياسىنىڭ جوباسى بويىنشا Masdar كومپانياسىمەن ۇكىمەتارالىق كەلىسىمگە قول قويۋدىڭ ماڭىزدىلىعى اتاپ ءوتىلدى.