قاسىم-جومارت توقايەۆ كليماتتىڭ وزگەرۋى جونىندەگى بۇۇ-نىڭ نەگىزدەمەلىك كونۆەنسياسى تاراپتارىنىڭ 28ء-شى كونفەرەنسياسى اياسىندا ACWA Power كومپانياسى ديرەكتورلار كەڭەسىنىڭ ءتوراعاسى مۇحاممەد ابۋناييانمەن كەزدەستى.
كەزدەسۋ بارىسىندا كومپانيانىڭ قازاقستانمەن ءوزارا ىقپالداستىعىن ودان ءارى نىعايتۋدىڭ نەگىزگى اسپەكتىلەرى جانە ءبىرقاتار ينۆەستيسيالىق جوبانى جۇزەگە اسىرۋ ماسەلەلەرى تالقىلاندى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.
سونداي-اق جەتىسۋ وبلىسىندا قۋاتى 1 گۆت بولاتىن جەل ەلەكتر ستانسياسىن سالۋ پەرسپەكتيۆالارى قاراستىرىلدى. بۇل نىسانعا 1،8 ميلليارد دوللار كولەمىندە ينۆەستيسيا قۇيۋ كوزدەلىپ وتىر.
مۇحاممەد ابۋناييان كومپانيانىڭ قازاقستانداعى ۇلەسىن كەڭەيتۋگە جانە جاسىل ەنەرگەتيكا سەكتورىندا ينۆەستيسيالىق جوبالاردى جۇزەگە اسىرۋعا مۇددەلى ەكەنىن ايتتى.
قاسىم-جومارت توقايەۆتىڭ پىكىرىنشە، بۇل باستاما قازاقستاننىڭ جاڭارتىلاتىن ەنەرگيا كوزدەرىن دامىتۋدىڭ وڭىرلىك ورتالىعى بولۋ نيەتىنە ساي كەلەدى.
مەملەكەت باسشىسى كومپانيانىڭ قىزمەتى مەن اۋقىمدى جوبالارىن، اتاپ ايتقاندا، قۇنى 4،6 ميلليارد دوللار بولاتىن دۋبايداعى «Noor Energy 1» كۇن ەلەكتر ستانسياسىنىڭ قۇرىلىسىن جوعارى باعالادى. بۇل الەمدەگى ەڭ ءىرى نىسان سانالادى.