مينيستر فەرمەرلەردىڭ كوكتەمگى ەگىس جۇمىستارىنا دايىندىق بارىسى تۋرالى ايتتى.
مەملەكەت باسشىسىنا ەلىمىزدىڭ اگروونەركاسىپتىك كەشەنىنىڭ قازىرگى جاعدايى جانە 2022 جىلعا ارنالعان مىندەتتەر، ازىق-تۇلىك قاۋىپسىزدىگىن قامتاماسىز ەتۋ، سونداي-اق سالانى رەفورمالاۋ بويىنشا قابىلدانىپ جاتقان شارالار تۋرالى باياندالدى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.
ەربول قاراشوكەيەۆ پرەزيدەنت تاپسىرمالارىنىڭ ورىندالۋ بارىسى تۋرالى باياندادى. اتاپ ايتقاندا، فەرمەرلەردىڭ كوكتەمگى ەگىس جۇمىستارىن جۇرگىزۋگە دايىندىعى تۋرالى حاباردار ەتتى. ۆەدومستۆو شارۋالاردىڭ جانار-جاعارماي، تىڭايتقىش، تۇقىم قورلارىمەن قامتاماسىز ەتىلگەندەرىن جانە تەحنيكالاردىڭ دايىندىعىن قايتا تەكسەردى. پرەزيدەنت وسى باعىتتاعى قارجىلاندىرۋ كولەمىن 2 ەسە ۇلعايتۋ تۋرالى شەشىم قابىلدادى. ءمينيستردىڭ ايتۋىنشا، قازىرگى ۋاقىتتا شارۋاشىلىقتار كوكتەمگى ەگىس ناۋقانىنا تولىق دايىن.
سونىمەن قاتار، مەملەكەت باسشىسى اگروونەركاسىپ كەشەنى مەن ۆەتەريناريا سالاسىنا مەملەكەتتىك قولداۋ كورسەتۋ جۇيەسىن جەتىلدىرۋ، جەكە قوسالقى شارۋاشىلىقتاردى دامىتۋ ۇدەرىستەرىمەن تانىستى.
كەزدەسۋ سوڭىندا قاسىم-جومارت توقايەۆ ازىق-تۇلىك قاۋىپسىزدىگىن قامتاماسىز ەتۋ، وتاندىق تاۋارلاردى جاڭا نارىقتارعا شىعارۋ، اگرارلىق عىلىمدى دامىتۋ، كوكتەمگى ەگىستى ساپالى جۇرگىزۋ جونىندە ءبىرقاتار تاپسىرما بەردى. سونداي-اق جەردى ءتيىمدى پايدالانۋ ۇدەرىسىنە جانە پايدالانىلمايتىن جەرلەردى قايتارۋعا باقىلاۋدى كۇشەيتۋ قاجەتتىگىن اتاپ ءوتتى.