قاسىرەتتى وقيعادان بەرى 40 كۇن ءوتتى
مەملەكەت باسشىسى حازىرەت سۇلتان مەشىتىنە بارىپ، قاڭتار وقيعالارى كەزىندە قايتىس بولعان ازاماتتاردىڭ رۋحىنا قۇران باعىشتاۋ راسىمىنە قاتىستى، دەپ حابارلايدى اقوردا.
قاسىم-جومارت توقايەۆ قۇران باعىشتالعان سوڭ ارنايى ءسوز سويلەدى. قازاقستان پرەزيدەنتى بيىلعى جىل ەلىمىز ءۇشىن قايعىلى وقيعادان باستالعانىن، حالقىمىز وتە قيىن كۇندەردى باستان وتكەرگەنىن ايتتى.
«مەملەكەتىمىزدىڭ تۇتاستىعىنا، ازاماتتارىمىزدىڭ قاۋىپسىزدىگىنە، ەلىمىزدىڭ بولاشاعىنا ءقاۋىپ ءتوندى. ءبىز لاڭكەستەرگە دەر كەزىندە تويتارىس بەرىپ، بەتىن قايتاردىق. وكىنىشكە قاراي، دۇربەلەڭدە ءبىرقاتار ازاماتىمىز قازا تاپتى. بۇل – ناعىز قاسىرەت. قازىرگى تاڭدا ءتيىستى مەكەمەلەر ازاماتتاردىڭ ءاربىر ءىسى بويىنشا تەرگەۋ جۇمىستارىن جۇرگىزىپ جاتىر. ادام قۇقىعىن قورعاۋ ماسەلەسى مەن ءۇشىن اسا ماڭىزدى. قايعىلى جاعداي بۇكىل ەلدىڭ قابىرعاسىن قايىستىردى»، – دەدى قاسىم-جومارت توقايەۆ.
مەملەكەت باسشىسى وسىعان بايلانىستى جالپىۇلتتىق ازا تۇتۋ كۇنى جاريالانعانىن ەسكە سالدى.
«سول قاسىرەتتى وقيعادان بەرى 40 كۇن ءوتتى. بۇگىن مارقۇمداردىڭ رۋحىنا قۇران باعىشتاۋ ءۇشىن مەشىتكە ارنايى كەلدىم. قازا بولعان ادامداردىڭ جاقىندارىنا تاعى دا كوڭىل ايتامىن. مەملەكەت قارالى شاڭىراقتاردى قاراۋسىز قالدىرمايدى. مەن قايتىس بولعان ازاماتتاردىڭ وتباسىلارىنا قارجىلاي كومەك كورسەتۋدى تاپسىردىم»، – دەدى پرەزيدەنت.
قاسىم-جومارت توقايەۆ «قازاقستان حالقىنا» قورى دا وسى قايىرىمدىلىق جۇمىسقا اتسالىسادى دەپ ويلايتىنىن، ەندى حالقىمىزدىڭ تىنىشتىعىن بۇزۋعا جول بەرىلمەيتىنىن جەتكىزدى.
«حالقىمىزدىڭ بەرەكە-بىرلىگى مەن تىنىشتىعىن بۇزۋعا جول بەرمەيمىز. بۇل – بيلىكتىڭ عانا ەمەس، بارشا ازاماتتارىمىزدىڭ ورتاق بورىشى. مۇنداي قاسىرەت ەشقاشان بولماسىن!»، – دەدى مەملەكەت باسشىسى.
ءسوزىنىڭ سوڭىندا پرەزيدەنت قازاقستان حالقىنا سابىر، ەلىمىزگە اماندىق، جۇرتىمىزعا تىنىشتىق تىلەدى سونىمەن قاتار وسكەلەڭ ۇرپاق ءۇشىن تۇتاس ەل بولىپ جاڭا قازاقستاندى بىرگە قۇرۋعا شاقىردى.