قازاقستان پرەزيدەنتى قاسىم-جومارت توقايەۆ ەلىمىزدىڭ پراۆوسلاۆ حريستياندارىن روجدەستۆو مەرەكەسىمەن قۇتتىقتادى، دەپ حابارلايدى اlmaty-akshamy.kz.
«قۇرمەتتى وتانداستار! قازاقستاننىڭ بارشا پراۆوسلاۆيە حريستياندارىن روجدەستۆو مەرەكەسىمەن قۇتتىقتايمىن! بۇل مەيرامدا جوعارى ادامگەرشىلىك قاسيەتتەر كەڭىنەن دارىپتەلەدى، ىزگىلىك پەن ادىلدىكتى ورنىقتىرا تۇسۋگە باسا ءمان بەرىلەدى. روجدەستۆو ادامزاتتى جاسامپاز ءارى مەيىرىمدى بولۋعا، جاقىندارىنا قامقورلىق تانىتۋعا جانە مۇقتاج ادامدارعا قول ۇشىن سوزۋعا ۇندەيدى، وسى دىنگە سەنەتىن جاندارعا ءۇمىت پەن قۋانىش سىيلايدى» دەپ اتاپ وتكەن مەملەكەت باسشىسى.
ونىڭ ايتۋىنشا، باسقا ءداستۇرلى دىندەر سەكىلدى پراۆوسلاۆيە دە مىزعىماس رۋحاني قۇندىلىقتاردى ورنىقتىرۋ، وسكەلەڭ ۇرپاققا تالىم-تاربيە بەرۋ جانە حالقىمىزدىڭ سان قىرلى تاريحي-مادەني مۇراسىن ساقتاۋ جولىندا ماڭىزدى ءرول اتقارادى.
پراۆوسلاۆيە ەلىمىزدىڭ دايەكتى دامۋىنا قاجەتتى باستى شارتتىڭ ءبىرى — جالپىۇلتتىق بىرلىگىمىزدى نىعايتۋعا دا ىقپال ەتەدى.
«پراۆوسلاۆيەنى ۇستاناتىن ازاماتتارىمىز ادىلەتتى قازاقستاندى قۇرۋعا جانە ەڭبەكقورلىققا، ءبىلىمپازدىققا، وتانشىلدىققا، تىلەكتەستىككە، ءوزارا جاۋاپكەرشىلىككە نەگىزدەلگەن جاڭا قوعامدىق ەتيكانى قالىپتاستىرۋعا ەلەۋلى ۇلەس قوسادى دەپ سەنەمىن. بارشاڭىزعا زور دەنساۋلىق جانە باق-بەرەكە تىلەيمىن!» دەيدى قاسىم-جومارت توقايەۆ.