پارلامەنت ماجىلىسىندە ۇستامدى ءارى مىقتى بىرنەشە پارتيا بولۋى كەرەك
مەملەكەت باسشىسى قاسىم-جومارت توقايەۆ «حابار 24» تەلەارناسىنا بەرگەن سۇحباتىندا ەلىمىزدىڭ پارلامەنتتىك جۇيەسىن رەفورمالاۋ جونىندەگى ويىن ايتتى، دەپ حابارلايدى Almaty-akshamy.kz.
سۇحباتى بارىسىندا پرەزيدەنت ەلىمىزدەگى پارلامەنتتىك جۇيەنى، پارتيالىق جۇيەنى رەفورمالاۋدى شىنداپ ويلانىپ جۇرگەنىن جانە بۇل جايىندا 28 قاڭتاردا پارتيانىڭ سەزىندە دە ايتقانىن جەتكىزدى. وسى ورايدا ءتيىستى قادامدار مەملەكەت مۇددەسىنە ساي جاسالۋى كەرەك ەكەنىن اتاپ ءوتتى.
«ماجىلىستە بىرنەشە مىقتى پارتيا بولۋى ءتيىس. ولار ءتىپتى ۇكىمەتتى قۇرۋدا دا ءتىل تابىسا ءبىلۋى كەرەك. بىزگە وسىنداي وزگەرىستەرمەن بىرگە ساياسي مادەنيەت دەڭگەيىن كوتەرىپ، ساياسي تۇلعالاردى تاربيەلەۋ قاجەت. پوپۋليزمنەن ارىلۋ كەرەك. گەرمانياعا قاراڭىزدارشى، پارتيالار اۋىسىپ تۇرادى. بارلىعى مادەني تۇردە وزگەرەدى. پارتيالار ۇكىمەتتەگى لاۋازىمدى قىزمەتتەرگە ءوز وكىلدەرىن ۇسىنادى. مەنىڭشە، ۋاقىت وتە ءبىز وسىعان كەلەمىز. ال مۇنىڭ ءبارى مەن پرەزيدەنت بولىپ تۇرعاندا ورىندالعانىن قالايمىن»، - دەدى قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ.
سونىمەن قاسىم-جومارت توقايەۆ وپپوزيسيانىڭ بولۋىنا قاتىستى سۇراققا جاۋاپ بەردى.
«بىزدە وپپوزيسيا بار، الايدا كوبىنە كوشەدە جۇرەدى»، - دەدى پرەزيدەنت.
مەملەكەت باسشىسىنىڭ پايىمىنشا، پارلامەنت ماجىلىسىندە ۇستامدى ءارى مىقتى بىرنەشە پارتيا بولۋى كەرەك. جالپى، بۇل باعىتتا ساياسي مادەنيەتتى ءوسىرۋ اسا ماڭىزدى.