وقۋشىلاردىڭ رۋحاني دامۋىنا تولىق جاعداي جاسالۋى قاجەت دەدى پرەزيدەنت.
تۇركىستاندا ءوتىپ جاتقان ۇلتتىق قۇرىلتايدا مەملەكەت باسشىسى قاسىم-جومارت توقايەۆ وسىلاي دەدى، دەپ حابارلايدى Almaty-akshamy.kz.
«سونىمەن بىرگە بالالارعا ەكولوگيالىق تاربيە بەرۋ ماڭىزدى. ولاردى تابيعاتقا جاناشىرلىقپەن قاراۋعا ۇيرەتكەن ءجون. مادەني مۇرالارىمىزدى تانىپ-بىلۋگە، قورعاۋعا داعدىلاندىرۋ كەرەك. وقۋشىلار تەاترعا، مۇراجايعا جانە تاريحي ورىندارعا ءجيى بارىپ، رۋحاني جاعىنان دامۋى قاجەت. مۇنداي شارۋا بۇكىل ەلىمىز بويىنشا تۇراقتى تۇردە جۇرگىزىلۋى قاجەت. وقۋ-اعارتۋ مينيسترلىگى مەن مادەنيەت جانە سپورت مينيسترلىگى وسى ماسەلەمەن بىرلەسىپ شۇعىلدانۋى كەرەك»، - دەدى پرەزيدەنت.
سونداي-اق مەملەكەت باسشىسى وسكەلەڭ ۇرپاقتى ەڭبەكقورلىققا، بيزنەس جۇرگىزۋ شەبەرلىگىنە باۋلۋ ماسەلەسى نازاردان تىس قالماۋ كەرەكتىگىن اتاپ ءوتتى.
«مەن ۇرپاقتى ەڭبەكقورلىققا، بيزنەس جۇرگىزۋ شەبەرلىگىنە باۋلۋ ماسەلەسى جونىندە ۇنەمى ايتىپ ءجۇرمىن. ماسەلەن، كەيبىر كورشى ەلدەردىڭ جاستارى شەتەلدەرگە بارىپ، بەلسەندى تۇردە كاسىپپەن اينالىسادى، دۇكەن اشادى، ۇلتتىق تاعامدارىن دارىپتەيدى، قىسقاسى، ءناپاقاسىن تابادى. وسىنداي ارەكەتتەردەن ءبىزدىڭ جاستارىمىز دا ۇلگى السا، جامان بولمايدى. ارينە، بۇل – ەلدەن كەتىپ، ەڭبەك ەت دەگەن ءسوز ەمەس، بۇل – ەڭ باستىسى، ەڭبەكتىڭ جاقسى-جامانى جوق دەگەن ءسوز.
ءار ماسەلەنى ابدەن ساياسيلاندىرىپ، بوس ءسوز قۋماي، قول قۋسىرىپ قاراپ وتىرا بەرمەي، ناقتى جۇمىسپەن، قاراجات اكەلەتىن زاڭدى ىسپەن شۇعىلدانۋ كەرەك دەگەن ءسوز. مەن بىلتىرعى قۇرىلتايدا ۇرپاقتى ەڭبەككە باۋلۋعا قاتىستى ءبىرقاتار تاپسىرما بەردىم. سونىڭ نەگىزىندە مەكتەپتەرگە ەڭبەك ساباعى قايتارىلدى. وسى باعىتتاعى جۇمىستى ودان ءارى جالعاستىرۋىمىز كەرەك. سونداي-اق، ءبىز ەل بولىپ قاراپايىم ەڭبەك ادامىن قادىرلەي ءبىلۋىمىز قاجەت»، - دەپ ءمالىم ەتتى قاسىم-جومارت توقايەۆ.