پرەزيدەنت قاسىم-جومارت توقايەۆ ۇلتتىق قۇرىلتايدىڭ نەگىزگى وتىرىسىندا ەڭ ۇزدىك ەڭبەك ادامدارىن مەملەكەتتىك دەڭگەيدە ۇلىقتاۋ تۋرالى باستاما كوتەردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«قاجەتسىز ماماندىق بولمايدى، بىلىكسىز مامان بولادى. ەرىنبەي ەڭبەك ەتكەن جان ءوز ءىسىنىڭ مايتالمانى اتانادى. ال، كاسىبىن تولىق مەڭگەرگەن ادام قاشاندا سۇرانىسقا يە بولادى. ءبىز ەڭبەك ادامىنىڭ مارتەبەسىن كوتەرۋگە باسا ءمان بەرەمىز. ەلىمىزدە ءتۇرلى سالانىڭ كاسىبي مەرەكەسى بار. كوبىنەسە مۇنداي مەيرامدار نازاردان تىس قالىپ جاتادى. مەنىڭ ويىمشا، «ەڭبەك كۇنىنە» وراي ەڭ ۇزدىك مامانداردى مەملەكەتتىك دەڭگەيدە ۇلىقتاعان ءجون. بۇل قادام قوعامدا ەڭبەك كۋلتىن ورنىقتىرۋعا جول اشادى. شىن مانىندە، قانداي جۇمىس ىستەپ جۇرگەنىڭ ەمەس، ونى قالاي ىستەپ جۇرگەنىڭ الدەقايدا ماڭىزدى. مينيستر نەمەسە اكىم بولسىن، قۇرىلىسشى، دارىگەر، ءمۇعالىم بولسىن، ەڭ باستىسى، اركىم ءوز مىندەتىن ادال اتقارۋى كەرەك. نانىن ادال ەڭبەكپەن تابۋى كەرەك»، - دەدى پرەزيدەنت.
قاسىم-جومارت توقايەۆ ناعىز ەڭبەك ادامى دەگەنىمىز كىم دەپ پايىمدايتىنىن ايتتى.
«بۇل، ەڭ الدىمەن، وزىنە جۇكتەلگەن مىندەتتى ورىنداۋ ءۇشىن بارىن سالىپ ەڭبەك ەتەتىن بىلىكتى مامان. ناعىز ەڭبەك ادامى بۇل – ءىستىڭ ادامى، ياعني ءار ىسىنە، ءار قادامىنا جاۋاپكەرشىلىكپەن قارايتىن ادال ازامات. ال، جاۋاپسىزدىقتىڭ سالدارى نەگە اپارىپ سوقتىراتىنى كەشەگى ءورت كەزىندە ايقىن كورىندى. وسىنداي، كەلەڭسىز جاعدايلار تەك ورمان شارۋاشىلىعىندا ەمەس، باسقا دا سالادا بار»، - دەدى مەملەكەت باسشىسى.