مەملەكەت باسشىسى: جاستاردىڭ وتانشىلدىق رۋحىن كۇشەيتۋ كەرەك
قاسىم-جومارت توقايەۆ مەملەكەتتىك تۋدى قورلاعاندارعا قاتىستى پىكىر ءبىلدىردى. بۇل تۋرالى ەل پرەزيدەنتى ۇلتتىق عىلىم اكادەمياسىنىڭ 75 جىلدىعىنا ارنالعان سالتاناتتى سەسسيادا ايتتى، دەپ حابارلايدى Almaty-akshamy.kz Almaty.tv سايتىنا سىلتەمە جاساپ.
"ءبىز عىلىمنىڭ ۇلتتىق ەكونوميكاعا قوساتىن ۇلەسىن كوبەيتۋىمىز كەرەك. سونىمەن بىرگە، الەمدىك عىلىمي كەڭىستىكپەن ىقپالداستىقتى كۇشەيتكەن ءجون. عالىمدار ەلىمىزدىڭ رۋحاني دامۋىنا دا باسا ءمان بەرگەنى دۇرىس"، - دەدى سالتاناتتى جيىندا مەملەكەت باسشىسى.
توقايەۆ جاستاردىڭ وتانشىلدىق رۋحىن كۇشەيتۋ كەرەك ەكەنىن اتاپ ءوتتى.
"ءقازىر الەۋمەتتىك جەلىدە مەملەكەتتىك تۋدى قادىرلەۋ تۋرالى كوپتەگەن وي-پىكىرلەر ايتىلۋدا. وكىنىشكە قاراي، قاسيەتتى كوك تۋىمىزعا بايلانىستى ورىن العان جاعىمسىز جاعدايلار ازايماي تۇر. سوندىقتان، بايراعىمىزدى پايدالانۋ ءتارتىبىن قايتا قاراۋ كەرەك دەپ ويلايمىن. قاجەت بولسا، ءتيىستى زاڭدارعا وزگەرتۋلەر ەنگىزۋگە بولادى. ويتكەنى، كوك تۋىمىز – قاستەرلى تاۋەلسىزدىگىمىزدىڭ سيمۆولى"، - دەدى ول.
مەملەكەت باسشىسى حالقىمىزدىڭ «تۋعان جەرگە تۋىڭدى تىك» دەپ بەكەر ايتپاعانىن، ءارقاشان تۋىن بيىك ۇستاعان ەل ەكەنىمىزدى اتاپ ءوتتى.
سونداي-اق قانىش ساتبايەۆتىڭ "ءوز ەلىنىڭ قارا تاسىن ماقتان ەتە الماعان، وزگە جەردىڭ التىنىن دا ماقتاپ جارىتپاق ەمەس" دەگەن ءسوزىن مىسالعا كەلتىردى.
"مەملەكەتتىك رامىزدەرىمىزدى قاستەرلەۋ – ءار ازاماتتىڭ پەرزەنتتىك پارىزى. وسىنى وسكەلەڭ ۇرپاقتىڭ ساناسىنا سىڭىرەتىن، ەڭ اۋەلى، سىزدەر، ياعني زيالى قاۋىم"، - دەدى پرەزيدەنت.