پرەزيدەنت سامارقاند قالاسىندا وتەتىن تۇركى مەملەكەتتەرى ۇيىمىنىڭ ءسامميتى اياسىندا ماجارستان پرەمەر-مينيسترى ۆيكتور وربانمەن كەزدەستى، دەپ حابارلايدى Almaty-akshamy.kz Inform.kz-كە سىلتەمە جاساپ.
مەملەكەت باسشىسى قازاقستان مەن ماجارستان اراسىنداعى قارىم-قاتىناستى، ونىڭ ىشىندە ەكونوميكالىق ىنتىماقتاستىقتى ودان ءارى نىعايتۋعا نيەتتى ەكەنىن ءبىلدىردى.
«ءبىزدىڭ ەلدەر اراسىنداعى بايلانىس جاقسى دامىپ كەلە جاتىر. ايتسە دە ءبىز ەكى مەملەكەتتىڭ ىنتىماقتاستىعىنا تىڭ سەرپىن بەرۋىمىز كەرەك دەپ ويلايمىن. اسىرەسە، اراداعى ساۋدا اينالىمىنىڭ كولەمى ءالى دە قاناعاتتانارلىق دەڭگەيدە ەمەس. بۇل باعىتتا ەكى ەلدىڭ دە الەۋەتى زور. ماجارستان – قازاقستان ءۇشىن ماڭىزدى سەرىكتەس ەل. ءسىز پرەمەر-مينيستر رەتىندە ءبىزدىڭ ءتۇرلى سالاداعى ىنتىماقتاستىعىمىزدى ىلگەرىلەتۋگە كوپ ەڭبەك ءسىڭىرىپ كەلە جاتقانىڭىزدى بىلەمىن»، – دەدى مەملەكەت باسشىسى.
ءوز كەزەگىندە ماجارستان پرەمەر-مينيسترى ۆيكتور وربان ەكىجاقتى كەزدەسۋدى ۇيىمداستىرعانى ءۇشىن قازاقستان تاراپىنا العىس ايتتى.
«قازاقستان مەن ماجارستان اراسىنداعى قارىم-قاتىناستىڭ ورنى ەرەكشە. مەن وسىدان بىرنەشە جىل بۇرىن العاش رەت پرەمەر-مينيستر قىزمەتىن اتقارعاندا قازاقستان مەن ماجارستاننىڭ مادەني، ەكونوميكالىق بايلانىستارى وتە بەرىك بولعانىن بىلەمىن. ەندى ەكى ەلدىڭ ىنتىماقتاستىعىنا بيزنەس وكىلدەرى تىڭ سەرپىن بەرۋى كەرەك. قازاقستاننىڭ ءىرى كومپانيالارى ماجارستانعا ينۆەستيسيا قۇيسا، ەكونوميكالىق قارىم-قاتىناسىمىز جاڭا دەڭگەيگە كوتەرىلەر ەدى»، – دەدى ماجارستان پرەمەر-مينيسترى.
كەزدەسۋدە قازاقستان مەن ماجارستان اراسىنداعى مادەني-گۋمانيتارلىق بايلانىستار، سونداي-اق حالىقارالىق جانە ايماقتىق كۇن تارتىبىندەگى ماسەلەلەر تالقىلاندى.
سۋرەت: Inform.kz