پرەزيدەنت قاسىم-جومارت توقايەۆ قازاقستان حالقى اسسامبلەياسىنىڭ ءحححىى سەسسياسىنىڭ وتىرىسىندا تولەرانتتىلىقتى ناسيحاتتاپ جۇرگەن كرەاتيۆتى يندۋستريا وكىلدەرىنىڭ ەڭبەگىن اتاپ ءوتتى، دەپ حابارلايدى almaty-akshamy.kz
«وتكەن جىلدىڭ بويىندا اسسامبلەيا وكىلدەرى ەلدەگى رەزونانستىق جاعدايلارعا بايلانىستى پراگماتيكالىق جانە ۇيىستىرۋشى ۇستانىمدى العا تارتا وتىرىپ، بىرنەشە رەت مالىمدەمە جاسادى. سىزدەر قوعامدىق بىرلەستىكتىڭ ءبىر بولىگى عانا ەمەس، بەيبىتشىلىك پەن كەلىسىم يدەياسىنىڭ ناعىز وكىلەتتى وكىلدەرىسىز. ەتنوسارالىق جانە كونفەسسياارالىق قاتىناستار سياقتى سەزىمتال تاقىرىپتى تالقىلاۋ كەزىندە ءارقاشان پاراساتتىلىق پەن كورەگەندىكتىڭ ۇلگىسىن كورسەتىپ جۇرسىزدەر»، - دەگەن مەملەكەت باسشىسى وسى تاسىلگە سۇيەنە وتىرىپ، قوعامدا داۋ تۋعىزۋعا تىرىساتىن كەز كەلگەن ارەكەتكە قارسى تۇرۋعا بولاتىنىن مەڭزەدى.
«ءار ازامات ەل ىشىندە دە، شەتەلدە دە حالقىمىزدىڭ بىرلىگى مەن ىنتىماقتاستىق قۇندىلىقتارىن باتىل قورعاۋى ءتيىس. الەۋمەتتىك جەلىدەگى چەللەندجدەر بۇعان جاقسى مىسال. ءبىزدىڭ ەتنوسى ءارتۇرلى ازاماتتارىمىز حالىقتىڭ بىرلىگىن پاش ەتىپ، ەلدە كەمسىتۋشىلىكتىڭ جوق ەكەنىن جار سالىپ ءجۇر. كرەاتيۆتى يندۋستريا وكىلدەرى مەن جاي عانا شىعارماشىلىق ادامدار قازاقستانداعى دوستىق پەن ءوزارا تۇسىنىستىكتىڭ ەرەكشە اتموسفەراسىنا، ازاماتتارىمىزدىڭ مەيىرىمدىلىگى مەن تولەرانتتىلىعىنا ارنالعان كونتەنت جاساپ جۇرگەنى قۋانتادى. مۇنداي اندەر، ولەڭدەر، بەينەروليكتەر ءاردايىم كورەرمەندەردىڭ ىنتا-جىگەرىن وياتادى»، - دەدى مەملەكەت باسشىسى.