بۇگىن قازاقستان رەسپۋبليكاسى پرەزيدەنتىنىڭ كەڭەسشىسى مالىك وتاربايەۆ اباي ۋنيۆەرسيتەتىنىڭ بەلسەندى ستۋدەنتتەرىمەن كەزدەستى. ونىڭ باستى ماقساتى – مەملەكەت باسشىسى قاسىم-جومارت توقايەۆتىڭ «جاساندى ينتەللەكت داۋىرىندەگى قازاقستان: وزەكتى ماسەلەلەر جانە ونى تۇبەگەيلى سيفرلىق وزگەرىستەر ارقىلى شەشۋ» اتتى قازاقستان حالقىنا جولداۋىندا كوتەرىلگەن ماسەلەلەردى ءتۇسىندىرۋ جانە ونداعى ايتىلعان ايقىن باعدارلاردى ناسيحاتتاۋ. جىلى جۇزدەسۋ بارىسىندا ەمەن-جارقىن اڭگىمە بولدى.
پرەزيدەنت كەڭەسشىسى جولداۋ بويىنشا جىلدىڭ اياعىنا دەيىن قازاقستان جوعارى وقۋ ورىندارىن تۇگەل دەرلىك ارالىپ شىقپاق. جوو ستۋدەنتتەرىمەن ەڭ ءبىرىنشى كەزدەسۋدى ەلىمىزدەگى تۇڭعىش ۋنيۆەرسيتەتتەن باستاۋىنىڭ وزىندە سيمۆوليكالىق ءمان بار. ويتكەنى، ۇلتىمىزدىڭ ۇلى تۇلعالارى باستاۋىندا تۇرعان اباي ۋنيۆەرسيتەتى 1928 جىلى ەڭ العاشقى اشىلعان جوعارى وقۋ ورىنى. سونىمەن قاتار، ورتالىق ازيا مەن قازاقستانداعى پەداگوگيكالىق باعىتتاعى كوشباسشى ۋنيۆەرسيتەت. قاسيەتتى قارا شاڭىراقتان تۇلەپ ۇشقان تۇلەكتەر پەداگوگ رەتىندە ەرتەڭگى كۇنى مەملەكەتتىڭ ىرگەتاسىن نىعايتۋدا ماڭىزدى ءرول اتقارادى.
«مەن دە ستۋدەنت بولعانمىن. ال وسىنداي قۇندىلىعى جوعارى اباي ۋنيۆەرسيتەتىنىڭ ستۋدەنتى بولۋ – سىزدەر ءۇشىن ۇلكەن مارتەبە» دەدى مالىك نۇرجان ۇلى.
جولداۋدىڭ جاستار ءۇشىن اسا كوپ مۇمكىندىك بەرەتىن تەتىكتەرى تۋرالى بايانداعان م.وتاربايەۆ قاسىم-جومارت كەمەل ۇلىنىڭ «مەن الدىمىزعا وتە ماڭىزدى ستراتەگيالىق ماقسات قويدىم. قازاقستان ءۇش جىل ىشىندە مىندەتتى تۇردە جاپپاي سيفرلىق ەل بولۋى كەرەك. ءبىز جاپپاي سيفرلاندىرۋ جانە جاساندى ينتەللەكت تەحنولوگياسىن بارىنشا ەنگىزۋ ارقىلى ەكونوميكانى جاڭعىرتۋىمىز قاجەت» دەپ ايتقان ءسوزىنىڭ استارىندا جاتقان ۇلكەن ستراتەگيالىق قادامدار جاتقانىن ايقىنداپ بەردى.
ءقازىر قوعامدى جاساندى ينتەللەكت (جي) ماسەلەلەرىنە بايلانىستى تالاي-تالاي تولعامدى ويلار ءارى-سارى كۇيگە ءتۇسىرىپ جۇرگەنى بەلگىلى. ونى پرەزيدەنت كەڭەسشىسى جوققا شىعارىپ، جاساندى زەردە تەك قۇرال بولۋى كەرەك ەكەنىن ەسكە سالدى. بۇل ءوز كەزەگىندە ستۋدەنتتەر تاراپىنان زور قىزىعۋشىلىق تۋىنداتتى. ولار بولاشاق پەداگوگ رەتىندە «جي-مۇعالىممەن قانداي دا ءبىر باسەكەلەستىك تۋىنداۋى مۇمكىن بە؟» دەگەن وزەكجاردى سۇراقتارىن قويدى. وعان قاتىستى «ارينە، زاماناۋي پەداگوگتىڭ بىلىگى جوعارى بولعانى ءجون، ءبىراق جي ۇستاز بەرەتىن ادامي ءىلىمدى ەشقاشان بەرە المايدى» دەگەن جاۋاپ بەرىلدى.
ءوز ساۋالدارىن ەركىن ءارى جان-جاقتى قويعان ستۋدەنتتەر وزدەرىن مازالاعان كۇردەلىلىكتەرگە ناقتى-ناقتى مىسالدارمەن جاۋاپ الىپ، پرەزيدەنت كەڭەسشىسى مالىك وتاربايەۆ پەن اباي اتىنداعى قازۇپۋ باسقارما توراعاسى-رەكتور بولات تىلەپتىڭ جولداۋ تۋرالى، بۇگىنگى كۇن تارتىبىندەگى جاستاردى قىزىقتىراتىن تىڭ تاقىرىپتاردى كوتەرگەندەرىنە ريزاشىلىقتارىن ءبىلدىردى.
بۇل پىكىر الماسۋدان ءتۇرلى ينسايت العان جاستار تاعلىمى مەن ءتالىمى مول كەزدەسۋدەن موتيۆاسيا الىپ شىقتى.