قازاقستان پرەزيدەنتىنىڭ جولداۋى ەل دامۋىنىڭ ستراتەگيالىق باعدارىن ايقىنداپ بەردى. بۇل قۇجات مەملەكەتتىڭ الداعى كەزەڭدەگى الەۋمەتتىك، ەكونوميكالىق جانە ساياسي دامۋىنىڭ نەگىزگى باعىتتارىن قامتيتىن ماڭىزدى باعدارلاماعا اينالدى.
پرەزيدەنت ەلدى قىسقا مەرزىم ىشىندە وزىق سيفرلىق مەملەكەتكە اينالدىرۋدى باستى ماقسات رەتىندە بەلگىلەدى. جاساندى ينتەللەكت مينيسترلىگىنىڭ قۇرىلۋى، سيفرلىق كودەكستىڭ قابىلدانۋى جانە سيفرلىق اكتيۆتەر قورىن قالىپتاستىرۋ – زامان تالابىنا ساي شەشىمدەر. بۇل قادامدار ەلىمىزدىڭ عىلىمي-يننوۆاسيالىق الەۋەتىن ارتتىرىپ، جاڭا تەحنولوگيالىق سەرپىن بەرەدى. قازاقستاننىڭ حالىقارالىق باسەكەگە قابىلەتتىلىگىن قامتاماسىز ەتۋدە مۇنداي باستامالاردىڭ ماڭىزى زور.
ەكونوميكا سالاسىندا ينفلياسيامەن كۇرەس، زاڭسىز شىعارىلعان كاپيتالدى ەلگە قايتارۋ جانە جاڭا ينۆەستيسيالاردى تارتۋ ماسەلەلەرى ورىندى كوتەرىلدى. كاسىپكەرلەرگە سەنىم ارتۋ، ولاردى يندۋستريالىق جاڭعىرۋدىڭ قوزعاۋشى كۇشى ەتۋ – ۋاقىت تالابىنا ساي قادام. بۇل باعىت ەلدە ادىلەتتى ەكونوميكالىق جۇيەنى ورنىقتىرىپ، حالىقتىڭ تۇرمىس ساپاسىن كوتەرۋگە ىقپال ەتەدى.
قازاقستاننىڭ ەۋرازياداعى ترانزيتتىك ءرولىن نىعايتۋ – ستراتەگيالىق ماڭىزى بار ماسەلە. كونتەينەرلىك جانە مۋلتيمودالدى تاسىمالداردى دامىتۋ، جاڭا تاريفتىك ساياساتتى ەنگىزۋ – ەلىمىزدىڭ كولىك دالىزدەرى ارقىلى وتەتىن جۇك اعىنىن ەسەلەپ ارتتىرادى. بۇل تەك ەكونوميكالىق پايدا عانا ەمەس، ەلدىڭ گەوساياسي سالماعىن دا كوتەرەدى.
يمپورتقا تاۋەلدىلىكتى ازايتۋ، اۋىل شارۋاشىلىعىن قولداۋ جانە ازىق-تۇلىك قاۋىپسىزدىگىن نىعايتۋ مىندەتى ءادىل قويىلدى. بۇل – ۇلتتىق قاۋىپسىزدىكتىڭ نەگىزگى تىرەكتەرىنىڭ ءبىرى. ءوز ءونىمىمىزدى كوبەيتۋ ارقىلى ەلدىڭ ىشكى تۇراقتىلىعىن ساقتاۋعا بولادى.
جولداۋدا كاسپيي تەڭىزىن قورعاۋ مەن سۋ ديپلوماتياسىن دامىتۋعا ەرەكشە نازار اۋدارىلدى. سۋ رەسۋرستارى – كەلەشەكتە مەملەكەتارالىق قاتىناستاردىڭ وزەگىنە اينالاتىن فاكتور. سوندىقتان حالىقارالىق ۇيىم قۇرۋ باستاماسى – دەر كەزىندە جاسالعان قادام. بۇل تەك تابيعاتتى قورعاۋ عانا ەمەس، ايماقتىق تۇراقتىلىقتى قامتاماسىز ەتۋدىڭ كەپىلى.
ساياسي رەفورما اياسىندا قوس پالاتالى پارلامەنتتەن ءبىر پالاتالى جۇيەگە كوشۋ جونىندە ماسەلە كوتەرىلدى. بۇل – بيلىك قۇرىلىمىن ىقشامداپ، شەشىم قابىلداۋدى جەدەلدەتەتىن باتىل ۇسىنىس. 2027 جىلى رەفەرەندۋم وتكىزۋ باستاماسى حالىقتىڭ ەركىن ءبىلدىرۋ تەتىگىن كۇشەيتەدى. مۇنداي قادامدار قوعامداعى سەنىمدى ارتتىرىپ، ساياسي جۇيەنىڭ اشىقتىعىن قامتاماسىز ەتەدى.
زەينەتاقى جۇيەسىن جەتىلدىرۋ، دەموگرافيانى قولداۋ، جول قاۋىپسىزدىگىن كۇشەيتۋ، فارماسيەۆتيكالىق سالانى دامىتۋ، بۇقارالىق سپورتتى وركەندەتۋ – حالىقتىڭ ءومىر ساپاسىن تىكەلەي جاقسارتاتىن باستامالار. بۇل – مەملەكەتتىڭ باستى قۇندىلىعى – ادام كاپيتالىنا جاسالعان ينۆەستيسيا.
پرەزيدەنت جولداۋىندا ءپاتريوتيزمنىڭ جاڭا قىرى اشىلدى. ول تەك ءتىل مەن مادەنيەتتى ساقتاۋمەن شەكتەلمەي، جاسامپازدىققا، ءبىلىم مەن عىلىمعا ۇمتىلۋعا، يننوۆاسياعا، راديكاليزمنەن باس تارتۋعا نەگىزدەلۋى ءتيىس. بۇل – ۇلتتىق بىرلىكتى نىعايتاتىن، ەلدى العا باستايتىن كۇش.
جولداۋدا ايتىلعان مىندەتتەر – قازاقستاننىڭ تۇراقتى دامۋىنا، مەملەكەتتىك جۇيەنىڭ نىعايۋىنا جانە ۇلتتىق بىرلىكتىڭ ارتۋىنا جول اشادى. بۇل قۇجات ەلدىڭ بولاشاعىن ايقىندايتىن تاريحي باعدار رەتىندە باعالانۋى ءتيىس.