7 ءساۋىر كۇنى مەملەكەت باسشىسى قاسىم-جومارت توقايەۆ استانا قالاسىنىڭ اكىمى جەڭىس قاسىمبەكتى قابىلدادى. پرەزيدەنتكە ەلوردانىڭ الەۋمەتتىك-ەكونوميكالىق جانە ينفراقۇرىلىمدىق دامۋى تۋرالى اقپارات بەرىلدى، دەپ حابارلايدى almaty-akshamy.kz
پرەزيدەنتكە قالا تىرشىلىگىن قامتاماسىز ەتۋ جۇيەسىنىڭ نىساندارى (سسس-3، گاز جىلۋ ستانسيالارى، جەو-3، ت.ب.) جانە مەكتەپ، مەديسينالىق ورتالىق، جەڭىلدەتىلگەن قولجەتىمدى تۇرعىن ءۇي سەكىلدى الەۋمەتتىك نىساندار قۇرىلىسىنىڭ بارىسى، سونداي-اق اپاتتى جاعدايداعى ەسكى تۇرعىن ۇيلەردى ءسۇرۋ، تۇرعىن ءۇي الاپتارىن دامىتۋ، ۇلەستىك قۇرىلىس نىساندارىن اياقتاۋ، قالاعا گاز تارتۋ جانە اباتتاندىرۋ جۇمىستارى جونىندە باياندالدى.
استانا اكىمى بيىل 6،5 مىڭ الەۋمەتتىك پاتەر سالۋ جوسپارلانىپ وتىرعانىن، سونداي-اق "جايلى مەكتەپ» ۇلتتىق جوباسى اياسىندا 2 اۋىسىممەن وقيتىن 90 مىڭ وقۋشىعا ارنالعان جاڭا فورماتتاعى 24 مەكتەپتىڭ جوباسى جاسالىپ جاتقانىن اتاپ ءوتتى.
سونىمەن قاتار مەملەكەت باسشىسىنا ينۆەستيسيا تارتۋ شارالارى تۋرالى مالىمەت بەرىلدى. ەلورداعا قۇيىلعان ينۆەستيسيا كولەمى ءبىرىنشى توقساندا شامامەن 200 ميلليارد تەڭگەنى قۇرادى. بۇل وتكەن جىلدىڭ وسى كەزەڭىمەن سالىستىرعاندا 20 پايىز كوپ.
قاسىم-جومارت توقايەۆ استانانى ودان ءارى دامىتۋ، سۋمەن جانە جىلۋمەن قامتاماسىز ەتۋ نىساندارىنىڭ قۇرىلىسىن تەز ارادا اياقتاۋ، سونداي-اق ەلوردا تۇرعىندارىنىڭ وزەكتى ماسەلەلەرىن شەشۋ جونىندە ءبىرقاتار تاپسىرما بەردى.