پرەزيدەنت JD com ەلەكتروندى كوممەرسيا الاڭىندا قازاقستاننىڭ ۇلتتىق پاۆيلونىن اشتى، دەپ حابارلايدى Almaty-akshamy.kz. اقوردانىڭ رەسمي سايتىنا سىلتەمە جاساپ.
مەملەكەت باسشىسى قاسىم-جومارت توقايەۆ بيزنەستى ونلاين-كەڭىستىك ارقىلى جۇرگىزۋ الەم ەكونوميكاسىنىڭ ماڭىزدى باعىتىنا اينالعانىن ايتتى.
«ءقازىر ەلەكتروندى ساۋدا نارىعىنىڭ كولەمى 3،5 تريلليون دوللارعا جەتتى. بۇل ۇدەرىس جىل سايىن ارتىپ كەلەدى. حالىقارالىق ونلاين ساۋدا-ساتتىقتى دامىتۋ ىسىندە جۇڭگو وتە ماڭىزدى ءرول اتقارادى. بۇگىن الەمدەگى اسا ءىرى ەلەكتروندى ساۋدا الاڭىندا قازاقستاننىڭ ۇلتتىق پاۆيلونى اشىلادى. بۇل قادام ەكى ەلدىڭ الىس-بەرىسىن جانداندىرماق. بىلتىر قازاقستان مەن جۇڭگو اراسىنداعى تاۋار اينالىمى 31 ميلليارد دوللارعا جەتتى. ءبىز مۇنىمەن شەكتەلىپ قالمايمىز. ەلەكتروندى كوممەرسيا سالاسىنداعى ارىپتەستىكتى ودان ءارى دامىتامىز. سوندا ەكىجاقتى ساۋدا اينالىمىن جاقىن ارادا 40 ميلليارد دوللارعا جەتكىزۋگە مۇمكىندىك تۋادى. «سيفرلى جىبەك جولى» باستاماسى وسى مىندەتتى ورىنداۋعا جول اشادى»، – دەدى مەملەكەت باسشىسى.
ايفتا كەتەيىك، JD com (Jingdong Mall) – قىتايداعى تاۋارلار مەن قىزمەتتەر ساتۋعا ارنالعان ەڭ ءىرى ونلاين پلاتفورما. 1998 جىلى نەگىزى قالانعان ونلاين ريتەيل الاڭىنىڭ 400 ميلليوننان استام پايدالانۋشىسى بار. 2022 جىلى JD com 1 تريلليون يۋان تازا پايدا تاۋىپ، قىتايداعى ەلەكتروندى ساۋدا الاڭدارىنىڭ اراسىندا ءبىرىنشى ورىنعا شىققان. قازىرگى كەزدە پلاتفورمادا 40-تان اسا ەلدىڭ ۇلتتىق پاۆيلوندارى جۇمىس ىستەيدى. قازاقستاننىڭ ۇلتتىق پاۆيلونىن اشۋ جونىندە كەلىسىمگە بيىل ناۋرىز ايىندا قول قويىلدى. بۇگىندە ۇلتتىق پاۆيلونىمىزدا ەلىمىزدىڭ بىرنەشە ءونىم ءتۇرى ساتىلىمعا قويىلعان. بۇعان قوسا الداعى ۋاقىتتا ەكسپورتتىق الەۋەتى جوعارى 15 وتاندىق ازىق-تۇلىك ءوندىرۋشىسىنىڭ ونىمدەرىن (كۇنباعىس مايى، كونديتەر ونىمدەرى، سۋسىندار) جۇڭگو نارىعىنا شىعارۋ جوسپارلانىپ وتىر.
