پرەزيدەنت: جاستار مەن قابىلەتتى كادرلارعا جول بەرمەۋىمىز - ۇلكەن كەمشىلىگىمىز

بۇگىندە بىزدە ساياسي مەنەدجەرلەردى دايىنداۋ ءىسى اقساپ تۇر.

جاستار مەن قابىلەتتى كادرلارعا جول بەرمەۋىمىز - ۇلكەن كەمشىلىگىمىز. بۇل تۋرالى ق ر پرەزيدەنتى قاسىم-جومارت توقايەۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.

«ساياسي كادرلاردى دايىنداۋ. پارتيامىز كادرلار ۇستاحاناسىنا اينالىپ، سايلاۋشىلارمەن جۇمىس ىستەي الاتىن قازىرگى زامان ساياساتكەرلەرىن جانە مەملەكەتتىك قىزمەتشىلەردى دايىنداۋى ءتيىس. اشىعىن ايتساق، بۇگىندە بىزدە ساياسي مەنەدجەرلەردى دايىنداۋ ءىسى اقساپ تۇر. قازىرگى جاعدايدا ساياسي باسشىلار ءتۇرلى ماماندىق يەلەرىمەن، جاستارمەن، جۋرناليستەرمەن، حالقىمىزدىڭ بارلىق وكىلىمەن سويلەسە ءبىلۋى ءتيىس جانە دە مۇنداي ادامدار بىزدە از ەمەس. ءبىر عانا پروبلەما – ول الەۋمەتتىك ءليفتىنىڭ جوقتىعى. ءبىز جاستار مەن قابىلەتتى كادرلارعا جول بەرمەيمىز جانە بۇل - ءبىزدىڭ ۇلكەن كەمشىلىگىمىز»، - دەدى مەملەكەت باسشىسى AMANAT پارتياسىنىڭ كەزەكتەن تىس سەزىندە.

ق ر پرەزيدەنتى پارتيا قۇرىلىمىندا ساياسي مەنەدجمەنت اكادەمياسى جۇمىس ىستەيتىندىگىن جانە ونىڭ جۇمىسىن كۇشەيتۋ قاجەتتىگىن باسا ايتتى.

«ءبىر رەتتىك سەمينارلار مەن ترەنينگتەردەن دەپۋتاتتاردى، اكىمدەردى، مينيسترلەردى جانە وزگە دە پارتيادان ۇسىنىلاتىنداردى دايىندايتىن تولىققاندى باعدارلاماعا كوشۋ كەرەك. جەرگىلىكتى جەرلەردە پارتيالىق اكتيۆتەردى وقىتۋ ءۇشىن كوشپەلى ترەنينگتەردى دە جۇيەلى تۇردە وتكىزگەن ءجون. مەن ايتقان بارلىق مىندەتتەردى بارىنشا قىسقا مەرزىمدە ورىنداۋ قاجەت بولادى. سايلاۋشىلاردىڭ پارتياعا سەنىمىن ارتتىرۋ ءۇشىن جۇمىستىڭ بۇرىنعى فورمالدى ادىسىنەن باس تارتۋ كەرەك»، - دەدى قاسىم-جومارت توقايەۆ.