كەزدەسۋ بارىسىندا امەريكالىق قارجى حولدينگىنىڭ ەلىمىزدەگى قىزمەت اياسىن كەڭەيتۋ پەرسپەكتيۆالارى تالقىلاندى.
ەلىمىزدەگى بىردەن-بىر امەريكالىق بانك سانالاتىن Citibank Kazakhstan – حالىقارالىق ينۆەستورلار، مەملەكەتتىك سەكتور جانە ءىرى كاسىپورىندار ءۇشىن جەتەكشى سەرىكتەستەردىڭ ءبىرى، دەپ حابارلايدى Almaty-akshamy.kz.
مەملەكەت باسشىسى جۋىردا جاريالاعان قازاقستان حالقىنا جولداۋى اياسىندا ۇكىمەتكە وسى سالاداعى باسەكەلەستىكتى ارتتىرۋ ءۇشىن ەلىمىزگە ءۇش سەنىمدى شەتەلدىك بانكتى تارتۋ مىندەتىن جۇكتەگەنىن اتاپ ءوتتى.
پرەزيدەنت استانا حالىقارالىق قارجى ورتالىعىنىڭ جاھاندىق ينۆەستورلارمەن بايلانىسىن قامتاماسىز ەتۋ جانە قارجى سەكتورىنىڭ سيفرلىق ترانسفورماسياسىن دامىتۋعا اتسالىسۋ ىسىندەگى Citigroup كومپانياسىنىڭ ماڭىزدى ءرولىن وڭ باعالادى.
مەملەكەت باسشىسى قازاقستاننىڭ كولىك-لوگيستيكالىق الەۋەتىن ارتتىرۋعا باعىتتالعان ءبىرقاتار جوبانى قارجىلاندىرۋعا نيەت ءبىلدىرىپ وتىرعان Citigroup حولدينگىنىڭ الداعى جوسپارىن قولدايتىنىن ايتتى. سونىمەن قاتار اڭگىمەلەسۋ بارىسىندا ماكروەكونوميكالىق بولجامدار مەن الەمدىك قارجى نارىعىنداعى نەگىزگى ۇردىستەر تالقىلاندى.
كەزدەسۋ اياسىندا «قازاقستان تەمىر جولى» ۇك» اق مەن Citibank اراسىندا Wabtec لوكوموتيۆتەرىن ساتىپ الۋ ءۇشىن قارجىلاندىرۋدى ۇيىمداستىرۋدىڭ نەگىزگى شارتتارى تۋرالى كەلىسىمگە قول قويىلدى.