پرەزيدەنت قاسىم-جومارت توقايەۆ ەقىۇ-نىڭ قازىرگى ءتوراعاسى، سولتۇستىك ماكەدونيا رەسپۋبليكاسىنىڭ سىرتقى ىستەر ءمينيسترى بۋيار ءوسمانيدى قابىلدادى، دەپ حابارلايدى almaty-akshamy.kz
پرەزيدەنت بۋيار وسمانيگە ءىلتيپات بىلدىرە وتىرىپ، ونىڭ ەقىۇ-نىڭ قازىرگى ءتوراعاسى رەتىندە قازاقستانعا ساپارى ماڭىزدى ەكەنىن اتاپ ءوتتى.
– ءسىزدىڭ ساپارىڭىزدىڭ ءبىز ءۇشىن ماڭىزى زور. مەن ەلىمىزدىڭ وسى ۇيىمعا مۇشە سەنىمدى مەملەكەت رەتىندە ەقىۇ-نى قولدايتىنىن ايرىقشا اتاپ وتكىم كەلەدى. ۇيىمداعى پىكىرلەر قايشىلىعىنا قاراماستان، ەقىۇ – بالاماسى جوق ۇيىم . سوندىقتان ءبىز ونىڭ الەۋەتىنە قولداۋ بىلدىرۋگە كۇش سالۋىمىز كەرەك. 2025 جىلى حەلسينكي قورىتىندى اكتىسىنىڭ 50 جىلدىعىن اتاپ ءوتۋ اياسىندا ەقىۇ-نىڭ ءوزارا ديالوگقا ارنالعان بىرەگەي پلاتفورما رەتىندە قىزمەتەتۋىن جالعاستىرۋىنا قامتاماسىز ەتۋ وتە ماڭىزدى. ەلىمىزدىڭ ەقىۇ-مەن تىعىز ىنتىماقتاستىعى، 2010 جىلعى استانا ءسامميتىنىڭ دەكلاراسياسىندا بەكىتىلگەندەي، ءقاۋىپسىز قوعامداستىق قۇرۋ تۋرالى ورتاق كوزقاراسقا نەگىزدەلەدى، – دەدى قاسىم-جومارت توقايەۆ.
مەملەكەت باسشىسى قازاقستان مەن سولتۇستىك ماكەدونيا اراسىنداعى قارىم-قاتىناستى نىعايتۋ پەرسپەكتيۆالارىنا ايرىقشا توقتالدى.
– ەكىجاقتى قارىم-قاتىناسىمىزدا ەشقانداي ماسەلە جوق. ءبىز ىنتىماقتاستىعىمىزدى كەڭەيتۋ تۇرعىسىنان ەلەۋلى ناتيجەگە جەتتىك. ەلىڭىزدى قازاقستاننىڭ ەۋروپاداعى وتە ماڭىزدى سەرىكتەسى رەتىندە قاراستىرامىز جانە ءبىز سكوپەدە ءوز ەلشىلىگىمىزدى اشۋ جونىندە شەشىم قابىلدادىق، – دەدى پرەزيدەنت.
ءوز كەزەگىندە بۋيار وسماني ەقىۇ-نىڭ قازاقستانمەن جانە ورتالىق ازيا وڭىرىمەن ءوزارا بايلانىستى دامىتۋعا زور ماڭىز ارتىپ وتىرعانىن مالىمدەدى. ونىڭ ايتۋىنشا، 2010 جىلى استانادا وتكەن ەقىۇ ءسامميتى قازاقستاننىڭ وسى ۇيىم قىزمەتىنىڭ نەگىزگى باعىتتارىن قولداۋداعى بەلسەندى ءرولىن كورسەتتى.
– سولتۇستىك ماكەدونيانىڭ ۇيىم ءتوراعاسى رەتىندەگى ۇرانى – «بارلىعى ادامدار ءۇشىن». بۇل ءبىزدىڭ ادامعا باعدارلانعان ۇستانىمىمىزدى بىلدىرەدى. ءسىزدىڭ رەفورمالار باعدارلاماڭىز دا ادامدارعا ارنالعان ءارى ول ەقىۇ-نىڭ قاعيداتتارى مەن مىندەتتەمەلەرىمەن عانا ەمەس، ءبىزدىڭ ۇيىم ءتوراعالىعىنداعى باسىمدىقتارىمىزبەن دە ۇندەس. سونىمەن قاتار ءبىز قازاقستاننىڭ وڭىرلىك، سونداي-اق حالىقارالىق ىنتىماقتاستىقتى دامىتۋداعى ماڭىزدى ءرولىن اتاپ وتكىزىمىز كەلەدى، – دەدى مينيستر.
كەزدەسۋ سوڭىندا مەملەكەت باسشىسى سولتۇستىك ماكەدونيا پرەزيدەنتى ستيەۆو پەنداروۆسكييگە ىزگى تىلەگىن جولداپ، ونى قازاقستانعا ساپارمەن كەلۋگە شاقىردى.