اقوردانىڭ حابارلاۋىنشا، مەملەكەت باسشىسىنىڭ وكىمدەرىمەن:
- عالىمجان مامبەت ۇلى قويگەلدييەۆ قازاقستان رەسپۋبليكاسى باس پروكۋرورىنىڭ ورىنباسارى لاۋازىمىنا تاعايىندالدى؛
- نۇرداۋلەت مىقتىبەك ۇلى سۇيىندىكوۆ قازاقستان رەسپۋبليكاسى باس پروكۋراتۋراسىنىڭ اكتيۆتەردى قايتارۋ جونىندەگى كوميتەتىنىڭ ءتوراعاسى لاۋازىمىنا تاعايىندالدى.
عالىمجان قويگەلدييەۆ 1980 جىلى 3 قاڭتاردا جامبىل وبلىسىندا دۇنيەگە كەلگەن. ءال-فارابي اتىنداعى قازاق ۇلتتىق ۋنيۆەرسيتەتىن "حالىقارالىق قۇقىق" ماماندىعى بويىنشا بىتىرگەن.
ءال-فارابي اتىنداعى قازاق ۇلتتىق ۋنيۆەرسيتەتى زاڭ فاكۋلتەتىنىڭ ازاماتتىق جانە كاسىپكەرلىك قۇقىق كافەدراسىنىڭ وقىتۋشىسى، سىرتقى ىستەر مينيسترلىگىنىڭ شارۋاشىلىق باسقارماسى كونسۋلدىق قىزمەت دەپارتامەنتىنىڭ مامانى،سىرتقى ىستەر مينيسترلىگى اپپاراتىنىڭ اتتاشەسى، ءۇشىنشى حاتشىسى، قازاقستان رەسپۋبليكاسىنىڭ مونعولياداعى ەلشىلىگىنىڭ ءۇشىنشى، ەكىنشى حاتشىسى، قازاقستان رەسپۋبليكاسىنىڭ پاكىستان يسلام رەسپۋبليكاسىنداعى ەلشىلىگىنىڭ ەكىنشى حاتشىسى، ق ر باس پروكۋراتۋراسىنىڭ حالىقارالىق ىنتىماقتاستىق دەپارتامەنتى باستىعىنىڭ ورىنباسارى، ق ر باس پروكۋراتۋراسى حالىقارالىق ىنتىماقتاستىق دەپارتامەنتىنىڭ باستىعى قىزمەتتەرىن اتقاردى.
2022 جىلعى 16 قاراشادان قازىرگە دەيىن باس پروكۋرور اپپاراتىنىڭ باسشىسى بولىپ قىزمەت ەتتى.
نۇرداۋلەت سۇيىندىكوۆ ەڭبەك جولىن 2000 جىلى شىمكەنت قالاسى پروكۋراتۋراسىنىڭ قۇقىقتىق ستاتيستيكا جانە اقپارات جونىندەگى مامانى قىزمەتىنەن باستادى. وڭتۇستىك قازاقستان وبلىسى ارىس اۋدانى پروكۋرورىنىڭ اعا كومەكشىسى، شىمكەنت قالاسى پروكۋراتۋراسىنىڭ ءبولىم پروكۋرورى، ءبولىم باستىعى قىزمەتتەرىن اتقاردى.
2005-2010 جىلدارى باس پروكۋراتۋرانىڭ الەۋمەتتىك-ەكونوميكالىق سالاداعى قاداعالاۋ دەپارتامەنتى ءبولىمنىڭ اعا پروكۋرورى، ءبولىم باستىعى، باسقارما باستىعى، دەپارتامەنت باسشىسىنىڭ ورىنباسارى، باس پروكۋروردىڭ ەرەكشە تاپسىرمالار بويىنشا اعا كومەكشىسى - قازاقستان رەسپۋبليكاسى قۇقىق قورعاۋ ورگاندارىنىڭ ۇيلەستىرۋ كەڭەسىنىڭ حاتشىسى لاۋازىمدارىندا جۇمىس ىستەدى.
استانا قالاسىنىڭ "سارىارقا" اۋدانىنىڭ پروكۋراتۋراسىن باسقاردى، اقتوبە وبلىسى پروكۋرورىنىڭ ءبىرىنشى ورىنباسارى بولدى.
2018 جىلدان باستاپ كوممەرسيالىق قۇرىلىمداردا باسشىلىق لاۋازىمداردا، قازاقستان رەسپۋبليكاسى قورعانىس ءمينيسترىنىڭ كەڭەسشىسى بولىپ جۇمىس ىستەدى.
2022 جىلدىڭ ماۋسىمىنان باستاپ 2023 جىلعى قاڭتارعا دەيىن باس پروكۋراتۋرانىڭ ستراتەگيالىق دامىتۋ دەپارتامەنتىنىڭ باستىعى قىزمەتىن اتقاردى.
2023 جىلعى 16 قاڭتاردان قازىرگە دەيىن حالىقارالىق-قۇقىقتىق ىنتىماقتاستىق قىزمەتىنىڭ باستىعى بولىپ قىزمەت ەتتى.