بالالار ۇيىرمەلەرىنە قاتىستى جوبادا قارجى جىمقىرۋ ءىسى كوپ.
بۇل تۋرالى مەملەكەت باسشىسى قاسىم-جومارت توقايەۆ ۇكىمەتتىڭ كەڭەيتىلگەن وتىرىسىندا ايتتى، دەپ حابارلايدى Almaty-akshamy.kz.
«كەلەسى ماسەلە – قوسىمشا ءبىلىم بەرۋ. بۇل – وسكەلەڭ ۇرپاقتىڭ قارىم-قابىلەتىن دامىتۋ ءۇشىن قولعا الىنعان باستاما. قوسىمشا سپورتتىق جانە شىعارماشىلىق ءبىلىم بەرۋ ىسىنە مەملەكەت تاپسىرىسى بويىنشا قارجى بولىنەتىن بولدى. بۇل قادام ۇيىرمەلەر مەن سەكسيالارعا قاتىساتىن بالالاردىڭ سانىن 70 پايىزعا دەيىن ارتتىردى. مۇنى ستراتەگيالىق تۇرعىدان دۇرىس شەشىم بولدى دەپ سانايمىن.
دەگەنمەن، جوبا ىسكە قوسىلعان جىلى ءبىرقاتار ولقىلىققا جول بەرىلدى. ياعني، قارجى ماسەلەسىنە جانە ءتيىستى پورتالدىڭ («ارتسپورت») جۇمىسىنا قاتىستى قاتەلىكتەر بولدى. قارجىنى ارتىق جۇمساۋ، الاياقتىق، اشىقتان-اشىق جىمقىرۋ باستالدى. اتا-انالار بالالارىن بىردەن بىرنەشە ۇيىرمەگە بەرەتىن بولدى. وكىنىشكە قاراي، مۇنداي تەرىس پيعىل باسقا بالالاردىڭ جولىن كەسىپ وتىر»، - دەدى پرەزيدەنت.
وسى ورايدا مەملەكەت باسشىسى كەمشىلىكتىڭ ءبارىن تۇزەتىپ، وسى يگى باستامانى جالعاستىرۋ قاجەت ەكەنىن ايتتى.
«اكىمدىكتەر جانە ءماسليحاتتار قوسىمشا بىلىمگە بولىنەتىن بيۋدجەت قاراجاتى جەتپەي قالۋى مۇمكىن دەپ الاڭداپ وتىر. بىلىمگە سالىنعان قاراجات – مەملەكەت ءۇشىن ەڭ باستى ينۆەستيسيا بولۋى كەرەك. بۇل – وتە ماڭىزدى ماسەلە. تۇپتەپ كەلگەندە، دامۋدىڭ بىردەن-بىر جولى – ءبىلىم سالاسى. سوندىقتان بۇدان ەشكىم ۇتىلمايتىنى ءسوزسىز. ۇكىمەت پەن اكىمدەر جۇرتشىلىقپەن بىرلەسىپ، جوبانى جەتىلدىرۋى ءتيىس»، - دەدى ول.